டொயோட்டா நிறுவனம் எச்சரிக்கை

டொயோட்டா நிறுவனம், அமெரிக்காவின் இறக்குமதி வரிகளால் $9.5 பில்லியன் (சுமார் ₹75,000 கோடி) இழப்பைச் சந்திக்கும் என எச்சரித்துள்ளது.

இது எந்தவொரு நிறுவனமும் அறிவித்ததிலேயே மிக அதிகமான தொகையாகும். இந்த வரிகள் வாகனங்கள், உதிரிபாகங்கள், இரும்பு, அலுமினியம் போன்றவற்றின் மீதானவை.

இதன் காரணமாக, டொயோட்டா தனது நடப்பு நிதியாண்டின் செயல்பாட்டு லாப முன்னறிவிப்பை 16% குறைத்து, 3.2 டிரில்லியன் யென் ($ 21.7 பில்லியன்) ஆக நிர்ணயித்துள்ளது.

டொயோட்டாவின் நிதிப் பிரிவு தலைவர் தகனோரி அஸுமா, சந்தை சூழலை கணிப்பது கடினம் எனத் தெரிவித்துள்ளார். இந்த வரிகளால் ஏற்படும் தாக்கங்கள் குறித்து கருத்து தெரிவித்த அவர், அமெரிக்க வாடிக்கையாளர்களுக்காக வாகனங்களை தொடர்ந்து தயாரிப்போம் என உறுதியளித்தார்.

GM நிறுவனம் $4-5 பில்லியன் இழப்பை எதிர்பார்க்கும் நிலையில், Ford நிறுவனம் $3 பில்லியன் இழப்பை எதிர்பார்க்கிறது.

Stellantis நிறுவனம் $1.7 பில்லியன் கூடுதல் செலவை எதிர்பார்க்கிறது. இந்த நிலையில், டொயோட்டா அறிவித்த தொகை மிகப் பெரியதாகும்.
காலாண்டு நிதி நிலை ஏப்ரல் முதல் ஜூன் வரையிலான முதல் காலாண்டில், டொயோட்டா நிறுவனம் 1.17 டிரில்லியன் யென் லாபத்தை பதிவு செய்துள்ளது. இது கடந்த ஆண்டின் இதே காலகட்டத்தின் லாபமான 1.31 டிரில்லியன் யென்-ஐ விட குறைவு. குறிப்பாக, வட அமெரிக்காவில் அதன் செயல்பாடு 63.6 பில்லியன் யென் இழப்பைச் சந்தித்துள்ளது.

இதற்கு முக்கிய காரணம், அமெரிக்காவின் புதிய இறக்குமதி வரிகள். இந்த வரிகளால், டொயோட்டா, அதன் கனடா, மெக்சிகோ, ஜப்பான் ஆகிய நாடுகளில் இருந்து வட அமெரிக்காவிற்கு ஏற்றுமதி செய்யும் வாகனங்கள் மற்றும் உதிரிபாகங்கள் பாதிக்கப்பட்டுள்ளன.

வர்த்தக ஒப்பந்தமும் புதிய திட்டங்களும், அமெரிக்காவுக்கும் ஜப்பானுக்கும் இடையேயான புதிய வர்த்தக ஒப்பந்தம், ஜப்பான் வாகனங்களுக்கு விதிக்கப்பட்ட 27.5% வரியை 15% ஆக குறைத்துள்ளது. இது டொயோட்டா போன்ற நிறுவனங்களுக்கு ஓரளவு நிம்மதி அளிக்கும்.

ஆனால், இந்த ஒப்பந்தம் எப்போது நடைமுறைக்கு வரும் என்பது இன்னும் தெளிவாகவில்லை. இதற்கிடையே, டொயோட்டா நிறுவனம் ஜப்பானில் புதிய வாகன உற்பத்தி ஆலையை அமைக்க திட்டமிட்டுள்ளது. ஜப்பானில் வாகன விற்பனை சரிந்து வரும் சூழலில், இந்த புதிய ஆலை, எதிர்கால தேவைகளை பூர்த்தி செய்ய உதவும் என எதிர்பார்க்கப்படுகிறது. இந்த அறிவிப்புகளுக்குப் பிறகு, அந்த நிறுவனத்தின் பங்குகள் 1.5% சரிந்துள்ளன.