வரிவிதிப்பு குறித்து மாருதி சுசுகியின் தலைவர் ஆர்.சி.பார்கவா கருத்து

வரிவிதிப்பு குறித்து மாருதி சுசுகியின் தலைவர் ஆர்.சி.பார்கவா கருத்து
இந்தியாவிற்கு எதிரான அமெரிக்காவின் புதிய வரிவிதிப்பு குறித்து பேசிய மாருதி சுசுகி இந்தியா நிறுவனத்தின் (MSIL) தலைவர் ஆர்.சி.பார்கவா, எந்த விதமான ‘அச்சுறுத்தலுக்கும்’ இந்தியா அடிபணியக்கூடாது என்றும், இந்த நேரத்தில் இந்தியர்கள் அனைவரும் ஒன்றுபட்டு அரசாங்கத்தை ஆதரிக்க வேண்டும் என்றும் தெரிவித்தார்.

மேலும், உள்நாட்டில் சிறிய கார்களுக்கான ஜி.எஸ்.டி. வரியை குறைப்பதன் மூலம் அமெரிக்க வரிவிதிப்பால் ஏற்படும் பொருளாதார சிக்கலை எதிர்கொள்ள முடியும் என்றும் அவர் கூறினார்.

ஆகஸ்ட் 15-ம் தேதி பிரதமர் சிறிய கார்களுக்கான ஜி.எஸ்.டி. வரியை குறைப்பது குறித்து அறிவித்ததால், வரவிருக்கும் ஜி.எஸ்.டி. கவுன்சில் கூட்டத்தில் சிறிய கார்களுக்கான வரி 28% இலிருந்து 18% ஆக குறைக்கப்படும் என நம்புவதாக அவர் கூறினார். இது கீழ்நிலை நுகர்வோருக்கு மிகவும் பயனுள்ளதாக இருக்கும் என்றும் அவர் குறிப்பிட்டார்.

இந்த வரி குறைப்பு, சிறிய கார் சந்தையை மீண்டும் நிலைநிறுத்த உதவுவதுடன், ஒட்டுமொத்த கார் துறையின் வளர்ச்சிக்கும், வேலைவாய்ப்பு பெருக்கத்திற்கும் வழிவகுக்கும் என்று பார்கவா நம்பிக்கை தெரிவித்தார். ஜி.எஸ்.டி. கவுன்சிலின் முடிவைப் பொறுத்தே நிறுவனத்தின் உற்பத்தி விரிவாக்கமும் அமையும் என்றும் அவர் குறிப்பிட்டார்.

இந்தியாவில் பல ஆண்டுகளாக சிறிய கார்களின் விற்பனை சரிந்து வருகிறது. இருப்பினும், எஸ்.யு.வி. கார்களின் வளர்ச்சி கார் துறையை இதுவரை முன்னேற்றி வந்தது. ஆனால், சமீப காலங்களில் பயண வாகனங்களின் ஒட்டுமொத்த விற்பனை 1.6% சரிந்துள்ளதாக அவர் கூறினார்.

மேலும், சுற்றுச்சூழலுக்கு உகந்த வாகனங்களை ஊக்குவிக்கும் விதமாக, எலெக்ட்ரிக் கார்கள், ஹைபிரிட் கார்களுக்கான ஜி.எஸ்.டி. வரியை சமப்படுத்த வேண்டும் என்றும் பார்கவா கோரினார்.

தற்போது எலெக்ட்ரிக் கார்களுக்கு 5% ஜி.எஸ்.டி. வரி விதிக்கப்படும் நிலையில், ஹைபிரிட் கார்களுக்கு 28% ஜி.எஸ்.டி. வரி விதிக்கப்படுகிறது. காற்று மாசு, எண்ணெய் நுகர்வு குறைப்பு ஆகியவற்றுக்கு உதவும் அனைத்து தொழில்நுட்பங்களுக்கும் வரிச்சலுகை வழங்கப்பட வேண்டும் என அவர் வலியுறுத்தினார்.

1950-களில் ஜப்பானில் அறிமுகப்படுத்தப்பட்ட கேய் கார்கள் போல, இந்தியாவிலும் சிறிய, மலிவான கார்களை உருவாக்குவதன் மூலம் இருசக்கர வாகன உரிமையாளர்கள் எளிதாக கார்களை வாங்குவதை ஊக்குவிக்க முடியும் என்றும் அவர் தெரிவித்தார்.

மேலும், ரேர் எர்த் காந்தங்களுக்கான கட்டுப்பாடுகள் ஒரு எச்சரிக்கை சமிக்ஞை என்றும், அரசாங்கத்தின் தலையீட்டால் இந்த சிக்கல் விரைவில் தீர்க்கப்படும் என்றும் அவர் குறிப்பிட்டார்.