coca cola-வின் புதிய நிர்வாகி யார்???

கோகோ-கோலா நிறுவனத்தின் தலைமை நிர்வாகியாக ஜேம்ஸ் குவின்சிக்குப் பதிலாக ஹென்ரிக் பிரவுன் பொறுப்பேற்பார் என்று அந்நிறுவனம் அறிவித்தது. பிரவுன் “கலிபோர்னியாவில் பிறந்து பிரேசிலில் வளர்ந்த ஒரு அமெரிக்கக் குடிமகன்” என்றும் அதன் அறிவிப்பில் குறிப்பிட்டிருந்தது.

அமெரிக்காவைத் தளமாகக் கொண்ட ஒரு நிறுவனம், அதன் புதிய தலைமை நிர்வாகியின் குடியுரிமை பற்றி குறிப்பிட்டது வழக்கத்திற்கு மாறானதாக இருந்தது. இது புவிசார் அரசியல் காரணங்களுக்காகச் செய்யப்பட்டதா என்ற கேள்வியை எழுப்பியது ; குறிப்பாக இந்த ஆண்டு ஜனாதிபதி டொனால்ட் டிரம்ப் கோகோ-கோலா மற்றும் பிரேசில் ஆகிய இரு நாடுகளின் விவகாரங்களிலும் தலையிட்ட பிறகு இந்த சந்தேகம் எழுந்துள்ளது.

“டிரம்ப் அரசு மற்றும் குடியேற்றம் குறித்த சர்ச்சையையும் கருத்தில் கொண்டு, அவர்கள் அனைத்து முன்னெச்சரிக்கை நடவடிக்கைகளையும் எடுத்துக்கொள்கிறார்கள்,” என்று கார்ப்பரேட் நிர்வாக நிபுணர் சார்லஸ் எல்சன் கூறினார். “தற்போது இங்கு ‘அமெரிக்காவில் தயாரிக்கப்பட்டது’ என்ற ஒரு கோசம் வலுவடைந்துள்ள சூழலில், உங்கள் தலைமைச் செயல் அதிகாரி அமெரிக்காவில் உருவாக்கப்பட்டவர் என்பதை நீங்கள் தெளிவுபடுத்துகிறீர்கள்” என்றார்.

இந்நிலையில் பிரவுனின் குடியுரிமையை ஏன் குறிப்பிட்டது என்பது குறித்து கருத்து தெரிவிக்க கோகோ-கோலா மறுத்துவிட்டது.

டயட் கோக் மீது மிகுந்த பிரியம் கொண்ட டிரம்பின் மேசையில், அதை ஆர்டர் செய்ய ஒரு பொத்தான் இருப்பதாகக் கூறப்படும் அளவுக்கு, அந்தப் பான நிறுவனத்தின் செயல்பாடுகளில் அவர் மிகுந்த ஆர்வம் காட்டி வருகிறார். கடந்த ஜூலையில், கோலா பானத்தில் அதிக பிரக்டோஸ் சோள சிரப்பிற்குப் பதிலாக கரும்பு சர்க்கரையைப் பயன்படுத்த கோகோ-கோலா “ஒப்புக்கொண்டதாக” அவர் குறிப்பிட்டார். இது பல யூகங்களை ஏற்படுத்தியதுடன், சோள சுத்திகரிப்பு நிறுவனமான ஆர்ச்சர்-டேனியல்ஸ்-மிட்லாண்ட் நிறுவனத்தின் பங்குகளின் வீழ்ச்சிக்கும் வழிவகுத்தது.
சில நாட்களுக்குப் பிறகு, கோக் நிறுவனம் சர்க்கரையால் இனிப்பூட்டப்பட்ட ஒரு புதிய வகையை அறிமுகப்படுத்தப் போவதாக அறிவித்தது.

டிரம்ப் அமெரிக்கக் குடியேற்றக் கொள்கையை மாற்றி அமைப்பதற்கான நடவடிக்கைகளையும் எடுத்துள்ளார். ஆயிரக்கணக்கான விசாக்களை ரத்து செய்தும், சில நாடுகளில் இருந்து வரும் குடியேற்றத்தை “நிரந்தரமாக” நிறுத்துவதற்கு முயன்றும் வருகிறார்.

இந்த நிகழ்வுகளும், டிரம்ப் நிர்வாகத்தின் “அமெரிக்கா முதலில்” என்ற கொள்கையும், பிரவுனின் தேசிய இனத்தை ஒரு கண்ணாடி கோக் பாட்டிலைப் போலத் தெளிவாகத் தெரிவிப்பதே பாதுகாப்பானது என்று கோகோ-கோலா முடிவெடுக்கத் தூண்டியிருக்கலாம்.