மே மாதத்தில் முக்கிய துறையின் வளர்ச்சி 0.5% ஆக வீழ்ச்சி
ஐந்து துணைத் துறைகளில் உற்பத்தி சரிவு ஏற்பட்டதால், மே மாதத்தில் எட்டு முக்கியத் தொழில்துறைகளின் வளர்ச்சி விகிதம், ஏப்ரல் மாதத்தில் இருந்த 1.8 சதவீதத்திலிருந்து 0.5 சதவீதமாகக் குறைந்துள்ளதாக மத்திய அரசு தெரிவித்தது. இது கடந்த ஏழு மாதங்களில் மிகக் குறைந்த அளவாகும். ஜூன் 29 அன்று வெளியாகவுள்ள ஒட்டுமொத்தத் தொழில்துறை வளர்ச்சித் தரவுகளில் இது தாக்கத்தை ஏற்படுத்தும் என்று நிபுணர்கள் கருதுகின்றனர்.
எட்டு முக்கியத் தொழில்துறைகளின் கூட்டுக்குறியீடு (ICI) என்பது நிலக்கரி, கச்சா எண்ணெய், இயற்கை எரிவாயு, சுத்திகரிப்பு நிலையத் தயாரிப்புகள், உரங்கள், எஃகு, சிமெண்ட் மற்றும் மின்சாரம் ஆகிய எட்டு முக்கியத் தொழில்துறைகளின் கூட்டு மற்றும் தனிப்பட்ட உற்பத்திச் செயல்பாட்டை அளவிடுகிறது. தொழில்துறை உற்பத்திக்குறியீட்டில் (IIP) உள்ள பொருட்களின் மொத்த எடையில் இந்த எட்டு முக்கியத் தொழில்துறைகள் 40.27 சதவீதப் பங்கைக் கொண்டுள்ளன.
குறிப்பிட்ட மாதத்தில், எஃகு, சிமெண்ட் மற்றும் மின்சார உற்பத்தி வளர்ச்சி கண்ட நிலையில், நிலக்கரி, கச்சா எண்ணெய், இயற்கை எரிவாயு, சுத்திகரிப்பு நிலையத் தயாரிப்புகள் மற்றும் உரங்கள் ஆகியவற்றின் உற்பத்தியில் சரிவு (எதிர்மறை வளர்ச்சி) காணப்பட்டதாகத் தரவுகள் தெரிவிக்கின்றன.
பெட்ரோலியம் சார்ந்த துறையின் உற்பத்திச் சரிவே இந்தக்குறைந்த வளர்ச்சிக்கு முக்கியக் காரணம் என்று பேங்க் ஆஃப் பரோடாவின் தலைமைப் பொருளாதார நிபுணர் மதன் சப்நவிஸ் கருதுகிறார். கச்சா எண்ணெய், இயற்கை எரிவாயு மற்றும் சுத்திகரிப்பு நிலையத் தயாரிப்புகள் ஆகியவற்றின் உற்பத்தியில் சரிவு ஏற்பட்டது. கச்சா எண்ணெய் இறக்குமதி அதிகரிப்பு மற்றும் சர்வதேச சந்தையில் விலைக் குறைவு ஆகியவை இதற்குக் காரணமாக அமைந்தன. இயற்கை எரிவாயுவைப் பொறுத்தவரை, விநியோகச் சங்கிலிச் சிக்கல்கள் சரிசெய்யப்பட்ட நிலையில், உள்நாட்டு உற்பத்தி குறைந்தது. பெட்ரோலியப் பொருட்களின் ஏற்றுமதி குறைந்ததும் உற்பத்திச் சரிவுக்குக் காரணமாக அமைந்தது.
நிறுவனங்கள் தங்கள் இருப்பை (inventory) திறம்பட நிர்வகிப்பதில் கவனம் செலுத்தி உற்பத்தியைக் குறைத்ததால், நிலக்கரித் துறையில் எதிர்மறை வளர்ச்சி பதிவானது. இறக்குமதி அதிகரித்த போதிலும், உள்ளீட்டுப் பொருட்கள் (எரிவாயு) விநியோகத்தில் ஏற்பட்ட நெருக்கடியால் உர உற்பத்தி குறைந்தது. உள்கட்டமைப்புப் பணிகள் அதிகரித்ததன் காரணமாக, எஃகு மற்றும் சிமெண்ட் துறைகள் சீரான வளர்ச்சியைக் கண்டன. மின்சார உற்பத்தி 8.7 சதவீதம் உயர்ந்தது.
