சந்திரசேகரனின் மறுநியமனத்தை நியாயப்படுத்தும் டாடா சன்ஸ்

டாடா சன்ஸ் நிறுவனத்தின் மிகப்பெரிய பங்குதாரரான டாடா அறக்கட்டளைகளுக்கு, என். சந்திரசேகரனை மேலும் ஐந்து ஆண்டுகளுக்குத் தலைவராக மறுநியமனம் செய்தது செல்லுபடியாகும் என்று டாடா சன்ஸ் கடிதம் எழுதியுள்ளதாகத் தெரிய வந்துள்ளது. செப்டம்பர் 17 அன்று நடைபெற்ற டாடா சன்ஸ் நிர்வாகக்குழு கூட்டத்தில் நிறைவேற்றப்பட்ட தீர்மானம் குறித்த அதன் நிலைப்பாட்டை உறுதிப்படுத்தும் வகையில், அது மூன்று சட்டக் கருத்துகளை (legal opinions) அறக்கட்டளைகளுக்கு அனுப்பியுள்ளது. கடந்த வாரம் நடைபெற்ற பரபரப்பான நிர்வாகக்குழுக் கூட்டத்திற்குப் பிறகு டாடா அறக்கட்டளைகள் எழுப்பிய கேள்விகளுக்குப் பதிலாகவே இந்த நடவடிக்கை எடுக்கப்பட்டுள்ளது.

டாடா சன்ஸ் அனுப்பிய தகவலைப் பரிசீலித்த பிறகு, சந்திரசேகரனின் மறுநியமனத் தீர்மானத்திற்கு எதிராகச் சட்ட நடவடிக்கை எடுப்பதா என்பது குறித்து டாடா அறக்கட்டளைகள் முடிவெடுக்கக்கூடும் என்று வட்டாரங்கள் தெரிவிக்கின்றன. செப்டம்பர் 17 கூட்டத்திலிருந்தே, இந்த நிர்வாகக்குழு அறை மோதலை நீதிமன்றத்திற்குக் கொண்டு செல்ல டாடா அறக்கட்டளைகள் தயாராகி வருகின்றன.

டாடா அறக்கட்டளைகள் சார்பில் சந்திரசேகரனின் மறுநியமனத்தை எதிர்த்துப் போராடத் தான் இணையவிருப்பதாக உச்ச நீதிமன்ற வழக்கறிஞர் அபிஷேக் சிங்வி கடந்த வாரம் சமூக ஊடகப் பதிவு ஒன்றில் அறிவித்தார். இந்த விவகாரம் நீதிமன்றத்திற்குச் சென்றால் எதிர்கொள்ளும் வகையில், முன்னாள் சொலிசிட்டர் ஜெனரல் ஹரிஷ் சால்வே தலைமையிலான வலுவான வழக்கறிஞர்கள் குழுவுடன் டாடா சன்ஸ் நிறுவனமும் தயாராகி வருகிறது.

விவரம் அறிந்த ஒருவரின் கூற்றுப்படி, டாடா சன்ஸ் அளித்த பதிலை டாடா அறக்கட்டளைகள் ஆய்வு செய்து வருகின்றன. இவ்விகாரம் குறித்து டாடா சன்ஸ் அல்லது டாடா அறக்கட்டளைகள் தரப்பில் எந்தக் கருத்தும் தெரிவிக்கப்படவில்லை.

வாரியக் கூட்டத்தின்போது, பெரும்பான்மை வாக்குகள் இல்லாமல் சந்திரசேகரனுக்கு மூன்றாவது பதவிக்காலத்தை வழங்கும் தீர்மானம் செல்லுபடியாகாது என்று கூறி, இந்தியாவின் முன்னாள் தலைமை நீதிபதி டி.ஒய். சந்திரசூட் அளித்த கருத்தை டாடா அறக்கட்டளைகள் மேற்கோள் காட்டியிருந்தன.

நியமன இயக்குநர்களான நோயல் டாடா மற்றும் வேணு சீனிவாசன் ஆகியோர் முறையே அத்தீர்மானத்திற்கு எதிராகவும் ஆதரவாகவும் வாக்களித்திருந்தனர். நியமன இயக்குநர்கள் அல்லது ஒட்டுமொத்த வாரிய உறுப்பினர்களிடையே வாக்குகள் சமமாக இருக்கும்போது காஸ்டிங் வோட் (சமநிலையை முறிக்கும் வாக்கு) முறையைப் பயன்படுத்தலாம் என்று வாதிட்டு, மூத்த வழக்கறிஞர் சுதிப்தோ சர்க்கார் அளித்த சட்டக் கருத்தை டாடா சன்ஸ் சமர்ப்பித்திருந்தது.