ரேபிடஸ் சிப்களுக்காக 2 மேம்பாட்டு மையங்களைத் திறக்கும் HCL

October 27, 2026 1:17 PM

இந்திய தகவல் தொழில்நுட்ப சேவை நிறுவனமான HCL டெக்னாலஜிஸ், ஜப்பானிய சிப் தயாரிப்பு நிறுவனமான ரேபிடஸின் வளர்ந்து வரும் செமிகண்டக்டர் பொறியியல் தேவைகளை ஆதரிப்பதற்காக, இந்தியாவில் இரண்டு மேம்பாட்டு மையங்களை தொடங்கியுள்ளது.

பெங்களூரு மற்றும் ஹூப்ளியில் அமைந்துள்ள இந்த மையங்கள், HCL டெக்கின் முக்கிய பொறியியல் நிபுணத்துவத்தைப் பயன்படுத்தி, ரேபிடஸ் நிறுவனத்திற்கு மாஸ்க் வடிவமைப்பு, வடிவமைப்பு உள்கட்டமைப்பு, பிராசஸ் டிசைன் கிட் (PDK) உருவாக்கம், வடிவமைப்பு தொழில்நுட்ப இணை-மேம்படுத்தல் (design technology co-optimisation) மற்றும் லேஅவுட் வடிவமைப்பு உள்ளிட்ட பல்வேறு சேவைகளை வழங்கும்.

மேம்பட்ட லாஜிக் செமிகண்டக்டர்களை உருவாக்கி தயாரிக்கும் ஜப்பானிய நிறுவனமான ரேபிடஸ் கார்ப்பரேசன், அதன் செமிகண்டக்டர் பொறியியல் தேவைகளை பூர்த்தி செய்யும் நோக்கில், இந்தியாவில் HCL டெக்கின் இரண்டு மேம்பாட்டு மையங்களைத் தொடங்கியுள்ளதாக ஒரு செய்திக்குறிப்பில் தெரிவிக்கப்பட்டுள்ளது.

மேலும், ஜப்பானில் Rapidus நிறுவனத்திற்குத் தேவைப்படும் பொறியியல் திறமையாளர்களை உருவாக்குவதற்காக, இந்திய பொறியியல் திறமையாளர்களைக் கண்டறிந்து தயார் செய்யும் பணியிலும் HCL டெக் அந்நிறுவனத்துடன் இணைந்து செயல்படும்.

ரேபிடஸ் கார்ப்பரேசனின் பிரதிநிதி இயக்குனர் மற்றும் தலைமை நிர்வாக அதிகாரி அட்சுயோஷி கொய்கே கூறுகையில்: “HCL டெக்குடனான இந்த ஒத்துழைப்பின் மூலம், இந்தியாவில் வளர்ந்து வரும் செமிகண்டக்டர் பொறியியல் திறமையாளர்களை அணுகவும், ஜப்பானில் உள்ள எங்கள் செயல்பாடுகளுக்குத் துணையாக இருக்கும் வகையில் பிரத்யேக மேம்பாட்டுத் திறன்களை உருவாக்கவும் நாங்கள் எதிர்பார்க்கிறோம். எங்களின் நீண்டகால இலக்குகளை அடைவதற்குத் தேவையான தொழில்நுட்ப நிபுணத்துவத்தையும் வளங்களையும் உருவாக்க, இணைந்து செயல்பட ஆவலாக உள்ளோம்” என்று தெரிவித்தார்.

அடுத்த பத்தாண்டுகளின் தொழில்நுட்பங்களை மேம்பட்ட செமிகண்டக்டர்களே தீர்மானிக்கும் என்று HCL டெக்கின் தலைமை நிர்வாக அதிகாரி மற்றும் நிர்வாக இயக்குனர் சி. விஜயகுமார் குறிப்பிட்டார்.

இந்தக் கூட்டாணியானது ஜப்பான் மற்றும் இந்தியா இடையிலான வளர்ந்து வரும் உத்தி சார்ந்த ஒத்துழைப்பைப் பிரதிபலிக்கிறது. ரேபிடஸ் நிறுவனத்தின் அடுத்த தலைமுறை செமிகண்டக்டர் லட்சியங்களையும், HCL டெக்கின் பொறியியல் நிபுணத்துவத்தையும் ஒன்றிணைப்பதன் மூலம், சிப் பயன்பாட்டை விரைவுபடுத்தவும், சந்தைக்குக் கொண்டு வரும் கால அளவைக் குறைக்கவும், செமிகண்டக்டர் கண்டுபிடிப்புகளின் அடுத்த கட்டத்திற்கு அடித்தளம் அமைக்கவும் இது உதவும் என்று அவர் மேலும் கூறினார்.

Disclaimer: moneypechu.com-ல் பதிவிட்டுள்ள செய்திகள், கருத்துகள் கல்வி நோக்கத்துக்காக மட்டுமே செய்யப்பட்டவை.. நாங்கள்,பங்குச்சந்தை வழிகாட்டு ஆணையமான செபியில் பதிவு செய்த ஆலோசகர்கள் இல்லை.. முதலீடு செய்யும் முன்பு செபியில் பதிவு செய்த ஆலோசகரிடம் கலந்து ஆலோசித்து முடிவு செய்வது நல்லது. நீங்கள் எடுக்கும் முதலீட்டு ரிஸ்க் முழுவதும் உங்களைச் சேர்ந்தது.