ஹால்மார்க் தங்க நகைகள் மீதான பிஐஎஸ் கண்காணிப்பில் குறைபாடுகள்
இந்திய தர நிர்ணய அமைப்பின் (BIS) செயல்பாடுகள் குறித்த தணிக்கையில், நாடு முழுவதும் விற்பனை செய்யப்படும் ஹால்மார்க் முத்திரையிடப்பட்ட தங்க நகைகள் மீது முறையான ஒழுங்குமுறை கண்காணிப்பு இல்லை என்பதை இந்தியத் தலைமை கணக்குத் தணிக்கையாளர் (CAG) அலுவலகம் சுட்டிக்காட்டியுள்ளது. இது, இந்திய தங்க நகை சந்தையில் நகைகளின் தூய்மை குறித்த நுகர்வோரின் நம்பிக்கையைப் பாதிக்கும் சூழலை உருவாக்கியுள்ளது. இந்திய தர நிர்ணய அமைப்பின் (BIS) தரப்படுத்தல் மற்றும் அது தொடர்பான செயல்பாடுகள் குறித்த ‘பொருள் சார்ந்த இணக்கத் தணிக்கை’ (Subject Specific Compliance Audit) குறித்த இந்திய தலைமை கணக்கு தணிக்கையாளர் (CAG) அலுவலகத்தின் வரைவு அறிக்கை, நுகர்வோருக்கு விற்கப்படும் ஹால்மார்க் தங்கத்தின் தூய்மை குறித்து நகைக்கடைக்காரர்கள் தெரிவிக்கும் கூற்றுகளைச் சரிபார்ப்பதில் BIS தவறிவிட்டதைச் சுட்டிக்காட்டியுள்ளதாகத் தெரிகிறது.
கடந்த ஐந்து ஆண்டுகளில் (2020-21 முதல்), பதிவு செய்யப்பட்ட நகைக்கடைகளில் குறைந்தது 83.25 சதவீதக் கடைகளில் ஆண்டுக்கு ஒரு முறையாவது கண்காணிப்புத் தணிக்கை மேற்கொள்ள வேண்டும் என்ற மிக எளிமையான இலக்கைக்கூட BIS அடையவில்லை என்று அந்த வரைவு அறிக்கை குறிப்பிடுவதாகக் கருதப்படுகிறது.
BIS செயல்படும் நுகர்வோர் விவகாரங்கள், உணவு மற்றும் பொது விநியோக அமைச்சகத்திடம் இந்த வரைவு அறிக்கை சமர்ப்பிக்கப்பட்டு, அவர்களின் இறுதிப் பதிலைப் பெற்ற பிறகு, இது நாடாளுமன்றத்தில் தாக்கல் செய்யப்படும் என்று எதிர்பார்க்கப்படுகிறது. இந்த அறிக்கை நடப்பாண்டு ஜூலை மாதம் அமைச்சகத்துடன் பகிர்ந்து கொள்ளப்பட்டது.
நாட்டின் 392 அறிவிக்கப்பட்ட மாவட்டங்களில், ஹால்மார்க் முத்திரையிடப்பட்ட தங்க நகைகளை மட்டுமே விற்பனை செய்ய வேண்டும் என்பது சட்டப்படி கட்டாயமாகும். தற்போது, BIS-இல் பதிவு செய்யப்பட்ட சுமார் 2.3 லட்சம் நகைக்கடைகள் உள்ளன. வெள்ளி நகைகளுக்கு ஹால்மார்க் முத்திரை கட்டாயமில்லை என்றாலும், நுகர்வோரின் நம்பிக்கையை அதிகரிப்பதற்காக நகைக்கடைக்காரர்கள் தாமாக முன்வந்து ஹால்மார்க் முத்திரையைப் பயன்படுத்துகின்றனர்.
இந்த அறிக்கையில் உள்ள ஐந்து ஆண்டு காலத் தரவுகள், ஹால்மார்க் தங்க நகைகளை விற்பனை செய்வதற்காகப் பதிவு செய்யும் நகைக்கடைக்காரர்களின் எண்ணிக்கை அதிகரித்துள்ளதைக் காட்டுகின்றன; அதே சமயம், 2024-25 ஆம் ஆண்டில் உரிமம் பெற்றவர்களின் எண்ணிக்கை 28,865 ஆக இருந்த நிலையில், BIS வெறும் 5,444 நகைக்கடைகளில் மட்டுமே கண்காணிப்புத் தணிக்கையை மேற்கொண்டது.
