ஜி.எஸ்.டி. கவுன்சிலின் புதிய முடிவால் மோட்டார்சைக்கிள் விலைகள் குறையும்

ஜி.எஸ்.டி. மறுசீரமைப்பு: மோட்டார்சைக்கிள் ₹5,000-15,000 வரை மலிவாகும் – பஜாஜ் ஆட்டோ
பஜாஜ் ஆட்டோ நிறுவனத்தின் செயல் இயக்குனர் ராகேஷ் ஷர்மா, ஜி.எஸ்.டி. கவுன்சிலின் புதிய முடிவால் மோட்டார்சைக்கிள் விலைகள் குறையும் என்று தெரிவித்துள்ளார்.

3500cc க்கு குறைவான என்ஜின் திறன் கொண்ட பைக்குகளுக்கான ஜி.எஸ்.டி. வரி 28% இலிருந்து 18% ஆக குறைக்கப்பட்டுள்ளது.

இதனால், மாடலைப் பொறுத்து, பைக்குகளின் விலை ₹5,000 முதல் ₹15,000 வரை குறையும் என எதிர்பார்க்கப்படுகிறது.

இந்த நடவடிக்கை, விற்பனை அளவை அதிகரிப்பதுடன், வாடிக்கையாளர்கள் மேம்பட்ட மாடல்களை வாங்குவதையும் ஊக்குவிக்கும் என அவர் தெரிவித்தார். இந்த வரி குறைப்பு, இருசக்கர வாகன விற்பனையை 2018-19 ஆம் ஆண்டில் இருந்த உச்சநிலைக்கு மீண்டும் கொண்டுவரும் என எதிர்பார்க்கப்படுகிறது. தற்போதைய விற்பனை, அந்த ஆண்டின் விற்பனையை விட 10% குறைவாகவே உள்ளது.

உள் எரிபொருள் என்ஜின் கொண்ட வாகனங்களின் விலை குறைவது, மின்சார வாகனங்களுக்கான மாற்றத்தைக் குறைக்குமா என்ற கேள்விக்கு, ஷர்மா, “வாகனம் வாங்குவதற்கான செலவு முக்கியமானது. மின்சாரம், உள் எரிபொருள் வாகனங்களுக்கு இடையிலான விலை வேறுபாடும் இதில் ஒரு பங்கு வகிக்கிறது.

ஆனால், மக்கள் மின்சார வாகனங்களுக்கு மாறுவதற்கான முடிவு, இப்போது இந்த ஒரு அம்சத்தை மட்டும் பொறுத்து இல்லை. எனவே, மின்சார வாகனங்களின் வளர்ச்சி சற்று மெதுவாகலாம், ஆனால் அது உள் எரிபொருள் வாகனங்களின் வளர்ச்சியை விட அதிகமாகவே இருக்கும்” என்றார்.

மேலும், மின்சார வாகனங்களுக்கு மாறுவதற்கு வேறு பல காரணிகள் உள்ளதாக ராகேஷ் ஷர்மா தெரிவித்தார். மாதந்திர எரிபொருள் செலவு, பயன்பாட்டின் எளிமை, மேம்படுத்தப்பட்ட தொழில்நுட்பம் போன்ற பல காரணிகள், மக்களை மின்சார வாகனங்களை நோக்கி ஈர்க்கின்றன என அவர் கூறினார்.

முச்சக்கர வாகனங்களுக்கும் ஜி.எஸ்.டி. 18% ஆக குறைக்கப்பட்டுள்ளது. இது குறித்து பேசிய ஷர்மா, “கடைசி மைல் பயணத்திற்கான தேவை அதிகரித்து வருகிறது. வாங்குவதற்கான செலவு குறைவதால், புதியவர்கள் இந்தத் தொழிலுக்குள் நுழைய இது ஒரு நல்ல வாய்ப்பை வழங்கும்” என்று தெரிவித்தார்