இந்தியாவின் தங்கக் கடன் துறை பெரும் வளர்ச்சி பெறும் – முத்தூட் MD

இந்தியாவின் மிகப்பெரிய தங்கக் கடன் நிறுவனமான முத்தூட் ஃபைனான்ஸின் நிர்வாகத்தின் கீழ் உள்ள சொத்துக்கள் 50% அதிகரித்து ரூ. 1.63 லட்சம் கோடியாக உயர்ந்ததன் விளைவாக, நிகர லாபம் 95% ஆண்டு உயர்வுடன் ரூ. 10,134 கோடியாகப் பதிவாகியுள்ளது. மாறி வரும் புவிசார் அரசியல் சூழல் மற்றும் தங்கத்தின் மீதான இறக்குமதி வரியை உயர்த்த இந்தியா எடுத்த முடிவு ஆகியவற்றின் மத்தியிலும், இந்த நிதியாண்டிலும் இந்த வேகம் தொடரும் என்று எதிர்பார்ப்பதாக நிர்வாக இயக்குநர் ஜார்ஜ் அலெக்சாண்டர் முத்தூட் தெரிவித்துள்ளார்.

”தங்கத்திற்கான தேவையே இதற்கான முக்கிய உந்து சக்தியாகும். பிணையற்ற கடன்களைப் பெறுவது பெருகிய முறையில் கடினமாகி வருகிறது. எனவே இது தங்கக் கடன்களை நோக்கிய ஒரு இயல்பான மாற்றமாகும். இந்த ஈர்ப்பு தானாகவே அதிக லாபமாக மாறுகிறது. இரண்டாவதாக, எங்களிடம் சுமார் 4,900 கிளைகள் உள்ளன. மேலும் ஒவ்வொரு கிளையின் வணிகமும் ஒரு வருடத்திற்கு முன்பு ரூ. 20 கோடியிலிருந்து ரூ. 30 கோடியாக உயர்ந்துள்ளது. இதன் பொருள், எங்கள் செயல்பாட்டுச் செலவு குறைந்து, அதிக லாபத்திற்கு வழிவகுத்துள்ளது” என்று கூறியுள்ளார்.

இந்தியாவின் தங்கக் கடன் சந்தையில் மிகப்பெரிய சாத்தியக்கூறுகள் உள்ளன. சுமார் 25,000 டன் தங்கம் அல்லது தங்க நகைகள் இந்தியக் குடும்பங்களில் உள்ளன. அதில், சுமார் 5,000 டன் தங்கம் அடமானம் வைக்கப்படுகிறது. பயன்படுத்தப்படாமல் தேங்கியுள்ள இந்தத் தங்கம் அனைத்தும் நிதி அமைப்புக்குள் வந்தால், வளர்ச்சிக்கான வாய்ப்பு வெகுவாக அதிகரிக்கும் என்றார்.

தங்கத்தின் மீதான இறக்குமதி வரி உயர்வு, தங்கக் கடன் சந்தையைப் பாதிக்குமா என்ற கேள்விக்கு பதில் அளித்த அவர், ”விலை உயர்வு, தங்கத்தை அடமானம் வைப்பவர்களுக்குக் கடன் வாங்கும் சக்தியை அதிகரிப்பதால், அது வளர்ச்சி வேகத்தை மேலும் அதிகரிக்கும். இந்த நிச்சயமற்ற தன்மைகள் தங்கக் கடன் சந்தையின் போக்கை மாற்றாது. மேலும், போதுமான பாதுகாப்பு இருப்பதால் விலை ஏற்ற இறக்கங்கள் ஒரு பொருட்டாக இருக்காது” என்றார்.

தங்கம் விலைச் சரிவு ஏற்படுவது, மார்ஜின் கால் (margin call) வருவதற்கான சாத்தியக்கூறு குறித்து எச்சரிக்கையை ஏற்படுத்துகிறதா என்ற கேள்விக்கு பதில் அளித்த அவர், தங்கக் கடன்கள் குறுகிய காலக் கடன்கள் என்பதால், அத்தகைய சூழ்நிலை அரிதாகவே எழுகிறது என்றார்.