சிறு வணிகங்களுக்கான பிரத்யேகப் பிரிவை அமைக்கும் HCL டெக்

இந்தியாவின் முன்னணித் தகவல் தொழில்நுட்ப நிறுவனங்கள் பெரும்பாலும் ஃபார்ச்சூன் 500 பட்டியலில் உள்ள பெருநிறுவனங்களின் தேவைகளையே கவனித்து வருகின்றன. ஆனால், அக்சென்ச்சர் நிறுவனத்தின் உத்தியைப் பின்பற்றி, HCL டெக்னாலஜிஸ் இப்போது சிறிய நிறுவனங்களுக்கான வணிகத்தை உருவாக்கி வருகிறது.

இவ்விவகாரம் குறித்து அறிந்த இருவரின் தகவலின்படி, நாட்டின் மூன்றாவது பெரிய IT சேவை நிறுவனமான இது, இதற்கென ஒரு புதிய வணிகப் பிரிவை உருவாக்கியுள்ளது.

இப்பிரிவுக்காக ஒரு பிரத்யேகப் பிரிவை அமைக்கும் முதல் இந்தியத் தொழில்நுட்பச் சேவை நிறுவனம் இதுவாகும். ‘Neo.AI’ எனும் இப்பிரிவு, HCL டெக்கின் செயற்கை நுண்ணறிவு தளம் மற்றும் IT சேவைகளைப் பயன்படுத்தி, நடுத்தர அளவிலான வாடிக்கையாளர்களுக்கு மென்பொருள் உருவாக்கம், பராமரிப்பு மற்றும் டேடா பகுப்பாய்வு ஆகிய சேவைகளை வழங்கும்.

இந்நடவடிக்கையானது, நாட்டின் மிகப்பெரிய தொழில்நுட்பச் சேவை நிறுவனங்களின் பாரம்பரியமான மற்றும் அதிக வருவாய் ஈட்டித் தரும் வணிக முறைகளிலிருந்து மாறுபட்டு, வணிகத்தை விரிவுபடுத்துவதைக் குறிக்கிறது. இந்தியாவின் முன்னணி ஐந்து IT நிறுவனங்களான டி.சி.எஸ், இன்ஃபோசிஸ், HCL டெக், விப்ரோ மற்றும் டெக் மகேந்திரா ஆகியவை நீண்ட காலமாக ‘ஃபார்ச்சூன் 500’ நிறுவனங்களின் வருவாயையே பெரிதும் நம்பியுள்ளன. இந்நிறுவனங்கள் ஒவ்வொன்றும் தங்கள் மொத்த வருவாயில் குறைந்தது ஐந்தில் ஒரு பங்கைத் தங்களின் மிகப்பெரிய 10 வாடிக்கையாளர்களிடமிருந்தே பெறுகின்றன.

இந்த முயற்சி HCL டெக்கின் வருவாயை அதிகரிக்கும் என்று எதிர்பார்க்கப்படுகிறது; முன்னணி ஆறு நிறுவனங்களில் HCL டெக்கின் வருவாய் வளர்ச்சியே மிக வேகமாக இருக்கும் என்று கணிக்கப்பட்டுள்ளது. கடந்த நிதியாண்டில் 1,466 கோடி டாலர் வருவாயுடன் செயல்பட்ட இந்நிறுவனம், நடப்பு நிதியாண்டில் நிலையான நாணய மதிப்பின் அடிப்படையில் 1 முதல் 4 சதவீதம் வரை வளர்ச்சி காணும் என்று எதிர்பார்க்கப்படுகிறது. நிலையான நாணய மதிப்பு என்பது நாணய மாற்று விகித ஏற்ற இறக்கங்களைக் கணக்கில் கொள்ளாத அளவீடாகும்.

தகவல் அறிந்த இருவரில் ஒருவரின் கூற்றுப்படி, இந்தப் புதிய பிரிவு Coforge Ltd, Persistent Systems Ltd மற்றும் Mphasis Ltd போன்ற நடுத்தர அளவிலான IT சேவை நிறுவனங்களுக்கும் போட்டியாக அமையும்.