ரூபாயின் மதிப்பைக் காக்க டாலர் கையிருப்பைக் குறைக்கக் கூடாது – ரகுராம் ராஜன்

இந்திய ரூபாயின் மதிப்பைப் பாதுகாப்பதற்காக, ஒரு குறிப்பிட்ட இலக்கு எண்ணை நிர்ணயிப்பதிலோ அல்லது அந்நியச் செலாவணி கையிருப்பைக் கரைப்பதிலோ இந்தியா ஈடுபடக்கூடாது என்று இந்திய ரிசர்வ் வங்கியின் முன்னாள் ஆளுநர் ரகுராம் ராஜன் ராய்ட்டர்ஸ் செய்தி நிறுவனத்திற்கு அளித்த பேட்டியில் தெரிவித்துள்ளார்.

2026-ஆம் ஆண்டில் இதுவரை இந்திய ரூபாயின் மதிப்பு சுமார் 6 சதவீதம் சரிந்துள்ளது. ஆசியாவிலேயே மோசமான செயல்பாடு கொண்ட நாணயங்களின் பட்டியலில் இது இரண்டாவது இடத்தில் உள்ளது. மே மாதத்தில், ஒரு டாலருக்கு 96.96 ரூபாய் என்ற மிகக் குறைந்த அளவை எட்டி, புதிய சரிவைச் சந்தித்தது.

“முதலில் பதற்றமடைய வேண்டாம் என்பதே எனது அறிவுரை” என்று ராய்ட்டர்ஸ் குளோபல் மார்க்கெட்ஸ் ஃபோரத்திடம் கூறிய ரகுராம் ராஜன், கச்சா எண்ணெய் விலை தொடர்ந்து அதிகமாக இருந்தால், நடப்புக் கணக்கு பற்றாக்குறை மேலும் அதிகரிக்க வாய்ப்புள்ளதாக எச்சரித்தார்.

கச்சா எண்ணெய் விலை உயர்வு, அமெரிக்க அரசுப் பத்திரங்களின் லாப விகிதத்தில் (US Treasury yields) ஏற்பட்டுள்ள ஏற்றம் மற்றும் வெளிநாட்டு முதலீட்டாளர்கள் இந்தியப் பங்குச் சந்தையிலிருந்து தொடர்ந்து வெளியேறுவது போன்ற காரணங்களால், பணவீக்கம் மற்றும் ஒட்டுமொத்த நிதி நிலைத்தன்மைக்கு ஏற்படக்கூடிய பாதிப்புகளைக் கட்டுப்படுத்த ரிசர்வ் வங்கி தனது தலையீட்டை அதிகரிக்க வேண்டிய கட்டாயத்திற்குத் தள்ளப்பட்டுள்ளது.

இந்த மாத தொடக்கத்தில், ரிசர்வ் வங்கி ஆளுநர் சஞ்சய் மல்ஹோத்ரா, நாணய மதிப்பை நிலைப்படுத்த பணவியல் கொள்கை நடவடிக்கைகளைப் பயன்படுத்துவதற்கான வாய்ப்பை நிராகரிக்கவில்லை.

தற்போது சிகாகோ பல்கலைக்கழகத்தின் பூத் ஸ்கூல் ஆஃப் பிசினஸில் பேராசிரியராகப் பணியாற்றும் ரகுராம் ராஜன், “மிகவும் நிதானமான அணுகுமுறையைக் கையாண்டு, நீண்ட கால அடிப்படையில் இதைப் பார்க்க வேண்டும். கடந்த கால நிகழ்வுகளுடன் ஒப்பிடுகையில், தற்போதைய சூழல் வழக்கத்திற்கு மாறானதா என்பதை ஆராய வேண்டும்” என்று கூறினார்.

“இத்தகைய சூழலில், நாணய மதிப்பு ஓரளவு சரிவது மோசமான ஒன்றல்ல. இது ஏற்றுமதியை நிலைப்படுத்தவும், உள்நாட்டுப் பொருட்களை சர்வதேசச் சந்தையில் அதிக போட்டித்தன்மை கொண்டவையாக மாற்றவும் உதவும்” என்றார்.

இந்த ஆண்டின் தொடக்கத்தில், சிறப்பு திட்டங்கள் மூலம் ரிசர்வ் வங்கி திரட்டிய 14,000 கோடி டாலருக்கும் அதிகமான தொகையில், சுமார் பாதியை ஏற்கனவே செலவிட்டுள்ளது.