சர்ச்சைக்குரிய ராஜேஷ் எக்ஸ்போர்டிஸில் LICயின் முதலீடுகள் 5 மடங்கு அதிகரிப்பு

2021 முதல் 2025 வரையிலான நிதியாண்டுகளில் வருவாயை ரூ. 15.15 லட்சம் கோடி அளவுக்கு மிகைப்படுத்திக் காட்டியதாகக் கூறப்படும் குற்றச்சாட்டின் பேரில், இந்தியப் பங்கு மற்றும் பரிவர்த்தனை வாரியத்தின் (SEBI) கண்காணிப்பு வளையத்தில் உள்ள ராஜேஷ் எக்ஸ்போர்ட்ஸ் நிறுவனம், மூன்று தசாப்தங்களுக்கு முன்பு 1995-ல் பங்குச் சந்தையில் பட்டியலிடப்பட்டது. ஆனால், அந்நிறுவனத்தின் இணையதளத்தில் உள்ள பங்குதாரர் விவரங்களின்படி, கடந்த 10 ஆண்டுகளுக்கும் மேலாக உள்நாட்டு நிறுவன முதலீட்டாளர்களில் ஒருவரைத் தவிர மற்ற அனைவரும் இந்நிறுவனத்தின் பங்குகளை வாங்குவதைத் தவிர்த்துள்ளனர்.

ராஜேஷ் மேத்தா என்பவரால் தொடங்கப்பட்ட தங்க மற்றும் ஆபரண ஏற்றுமதி நிறுவனமான ராஜேஷ் எக்ஸ்போர்ட்ஸில் உள்நாட்டு நிறுவனங்களின் முதலீட்டு நிலையை ஆராய்ந்தால், மியூச்சுவல் ஃபண்ட் நிறுவனங்களின் அதிகபட்ச முதலீடு மார்ச் 2016-ல் 0.5% ஆக இருந்தது தெரியவருகிறது; அதன்பிறகு அது குறைந்து கொண்டே வந்து, தற்போது பூஜ்ஜியமாக உள்ளது.

தனியார் துறை காப்பீட்டு நிறுவனங்களிடம் இந்நிறுவனத்தின் பங்குகள் ஏதுமில்லாத நிலையில், பொதுத்துறை நிறுவனமான எல்.ஐ.சி (LIC) மட்டுமே இத்தனை ஆண்டுகளாக ஒரு பெரிய உள்நாட்டு நிறுவன முதலீட்டாளராக இருந்து வருகிறது. உண்மையில், ராஜேஷ் எக்ஸ்போர்ட்ஸில் எல்.ஐ.சி-யின் பங்கு அளவு மார்ச் 2016-ல் 1.99% ஆக இருந்து, மார்ச் 2022-ல் 11.22% ஆக ஐந்து மடங்கிற்கும் மேலாக அதிகரித்தது. அதன்பிறகு, மார்ச் 31, 2026 நிலவரப்படி அது சற்று குறைந்து 10.8% ஆக உள்ளது.

வெளிநாட்டு போர்ட்ஃபோலியோ முதலீட்டாளர்கள் (FPIs) மார்ச் 2016-ல் 15.87% முதல் மார்ச் 2023-ல் 17.7% வரையிலான பங்குகளைக் கொண்டிருந்தனர். கடந்த மூன்று ஆண்டுகளில், மார்ச் 2026-ல் அவர்களின் பங்கு அளவு 14.2% ஆகக் குறைந்தது; இதில் பெரும்பகுதி ‘பிரிட்ஜ் இந்தியா ஃபண்ட்’ (8.46%) மற்றும் ‘ஷ்வாப் ஃபண்டமெண்டல் எமர்ஜிங் மார்க்கெட் ஈக்விட்டி ஈடிஎஃப்’ (2.7%) ஆகிய இரண்டு வெளிநாட்டு முதலீட்டு நிறுவனங்களிடமே உள்ளது.

இதுகுறித்துத் தொடர்பு கொண்டபோது, முன்னணி மியூச்சுவல் ஃபண்ட் மற்றும் தரகு நிறுவனங்கள், இந்நிறுவனத்தில் முதலீடு செய்வதில் தங்களுக்குத் தயக்கம் இருந்ததாகத் தெரிவித்தன. “அவர்கள் வெளியிட்ட நிதிநிலை எண்கள் மீது எங்களுக்கு ஒருபோதும் நம்பிக்கை இருந்ததில்லை; அதனால் முதலீட்டிற்கான எங்கள் தேர்வில் இந்நிறுவனம் இடம்பெறவில்லை,” என்று ஒருவர் கூறினார்.