மின்சார வாகன சந்தையில் 43% சந்தைப் பங்கை எட்டிய டாடா மோட்டார்ஸ்
சமீபத்திய ‘வாஹன்’ (VAHAN) பதிவுத் தரவுகளின்படி, ஜூலை மாதத்தில் இந்தியாவின் மின்சாரப் பயணிகள் வாகனச் சந்தையில் டாடா மோட்டார்ஸ் அதன் முன்னிலையை மேலும் அதிகரித்துள்ளது. மஹிந்திராவை விட கிட்டத்தட்ட 6,000 அதிக வாகனப் பதிவுகள் என்ற இடைவெளியை உருவாக்கியுள்ள டாடா மோட்டார்ஸ், மாதந்திர மின்சார வாகனப் பதிவுகளில் அதன் பங்கை சுமார் 43 சதவீதமாக உயர்த்தியுள்ளது.
இம்மாதத்தில் டாடா 13,579 மின்சாரப் பயணிகள் வாகனங்களைப் பதிவு செய்தது; இது முந்தைய ஆண்டை விட 101.8 சதவீத வளர்ச்சியாகும். அதேவேளையில், மஹிந்திரா தனது பதிவுகளை இருமடங்கிற்கும் மேலாக அதிகரித்து 7,677 வாகனங்களை (124.7 சதவீத உயர்வு) பதிவு செய்திருந்தாலும், அது தொடர்ந்து இரண்டாம் இடத்திலேயே நீடித்தது. மார்ச் மாதத்தில் சுமார் 38 சதவீதமாக இருந்த நிறுவனத்தின் மாதந்திர மின்சார வாகனப் பதிவுப் பங்கு, ஜூலை மாதத்தில் 43 சதவீதமாக சீராக உயர்ந்துள்ளதாக டாடா மோட்டார்ஸ் மூத்த அதிகாரிகள் தெரிவித்தனர்.
இந்தியாவின் பயணிகள் வாகனச் சந்தை வலுவான வளர்ச்சிப் பாதையில் தொடர்ந்து பயணித்தது; கடந்த ஆண்டு ஜூலையில் 3,42,532 ஆக இருந்த பதிவுகள், இந்த ஆண்டு 18.4 சதவீதம் அதிகரித்து 4,05,65,8 வாகனங்களாக உயர்ந்தன. இதில் மின்சார வாகனங்களின் பதிவு 31,788 ஆக இருந்தது; வழக்கமான எரிபொருள் மூலம் இயங்கும் பயணிகள் வாகனங்கள் 3,73,870 ஆக இருந்தன. இதன் மூலம் மொத்தப் பதிவுகளில் மின்சார வாகனங்களின் பங்கு 7.8 சதவீதத்தை எட்டியது.
மின்சார வாகனப் பதிவுகளின் எண்ணிக்கையில் டாடா நிறுவனம் கணிசமான முன்னிலையைத் தக்கவைத்திருந்தாலும், முன்னணி மின்சார வாகன உற்பத்தியாளர்களில் மிக வேகமாக வளர்ந்து வரும் நிறுவனமாக மஹிந்திரா உருவெடுத்துள்ளது; அதன் பதிவுகள் ஆண்டுக்கு ஆண்டு 124.7 சதவீதம் அதிகரித்துள்ளன. முந்தைய ஆண்டை விட 4.4 சதவீத சரிவைச் சந்தித்த போதிலும், எம்ஜி மோட்டார் இந்தியா 5,642 பதிவுகளுடன் மூன்றாம் இடத்தைத் தக்கவைத்துக் கொண்டது.
மாருதி சுஸுகி அதன் இ-விட்டாரா வாகனப் பதிவுகளைத் தொடர்ந்து அதிகரித்து ஜூலை மாதத்தில் 1,590 வாகனங்களை எட்டியது; அதேவேளையில், வின்ஃபாஸ்ட் நிறுவனம் 1,478 பதிவுகளுடன் சந்தையில் தனது ஆரம்பக்கட்ட இருப்பை உறுதிப்படுத்தியது.
