தங்கம் ஏன் Best..!! இத படிங்க..!!

இந்திய நுகர்வோரில் 86 சதவீதம் பேர் தங்கம் மற்றும் நகைகளைச் செல்வத்தை உருவாக்குவதற்கான விருப்பமான கருவியாகக் கருதுகின்றனர் என்று டெலாய்ட் இந்தியா நிறுவனம் புதன்கிழமை வெளியிட்ட அறிக்கை தெரிவித்துள்ளது.

நுகர்வோர்களின் முதலீட்டுப் பட்டியலில் நகைகளின் பங்கு, செல்வத்தைப் பாதுகாப்பது என்பதையும் தாண்டி விரிவடைந்து வருகிறது என்று அந்த அறிக்கை கூறியது.

“இந்திய நுகர்வோரில் 86 சதவீதம் பேர் இப்போது தங்கம் மற்றும் நகைகளைச் செல்வத்தை உருவாக்குவதற்கான விருப்பமான கருவியாகக் கருதுகின்றனர். இது பரஸ்பர நிதி மற்றும் பங்குகள் போன்ற சந்தையுடன் தொடர்புடைய முதலீட்டு கருவிகளுக்கு (87 சதவீதம்) ஏறக்குறைய இணையாக, இந்த வகையின் நீடித்த சொத்து மதிப்பை அடிக்கோடிட்டுக் காட்டுகிறது,” என்று அந்த அறிக்கை குறிப்பிட்டது.

45 வயது மற்றும் அதற்கு மேற்பட்ட நுகர்வோர் முதலீட்டை அடிப்படையாக கொண்ட தங்கம் வாங்குதல்களில் அதிக நாட்டம் காட்டுகின்றனர் என்றும் அது மேலும் கூறியது.

“இந்தியாவின் நகை சந்தை ஒரு திருப்புமுனையில் உள்ளது. இங்கு நுகர்வு என்பது இனி பாரம்பரியம் அல்லது விலையால் மட்டும் வரையறுக்கப்படவில்லை. மாறாக செல்வ உருவாக்கம், சுய வெளிப்பாடு மற்றும் அன்றாடப் பயன்பாடு ஆகியவற்றின் ஒருமித்த தன்மையால் வரையறுக்கப்படுகிறது” என்று டெலாய்ட் இந்தியாவின் பார்ட்னர் பிரவீன் கோவிந்து கூறினார்.

மேலும், உலகளாவிய நிறுவனங்களுடன் ஒப்பிடும்போது, இந்திய நகை சில்லறை விற்பனையாளர்கள் 5-10 சதவீத EBITDA லாப வரம்பில் செயல்படுகின்றனர். இது மூலதன முடக்கம் மற்றும் லாப வரம்பு அழுத்தத்திற்கு வழி வகுக்கிறது என்று அந்த அறிக்கை கூறியது.