பல மடங்கு உயரப்போகும் தங்கம் விலை : கிறிஸ் வுட் கணிப்பு

ஜெஃபரிஸ் நிறுவனத்தின் உலகளாவிய பங்கு வியூக தலைவர் கிறிஸ்டோபர் வுட், தங்கம் ஒரு பெரிய ஏற்றத்தில் (secular bull market) இருப்பதாகவும், அதன் விலை அவுன்ஸ் ஒன்றுக்கு 6,600 அமெரிக்க டாலராக உயரும் என்றும் கணித்துள்ளார்.

2025-ஆம் ஆண்டில் இதுவரை தங்கத்தின் விலை சுமார் 43% உயர்ந்துள்ள நிலையில், புவிசார் அரசியல் பதட்டங்கள், டிரம்ப் அரசின் வர்த்தக வரிகள், உலகளாவிய மத்திய வங்கிகளின் கொள்முதல் ஆகியவை இந்த உயர்விற்கு முக்கிய காரணங்களாகக் கூறப்படுகின்றன.

தங்க விலையின் கணிப்பு முறை கிறிஸ்டோபர் வுட் தனது கணிப்புக்கு ஒரு தனித்துவமான முறையைப் பயன்படுத்துகிறார். 1980 ஜனவரியில் தங்கம் அதன் உச்சத்தை எட்டியபோது, அதன் விலை ஒரு தனிநபரின் செலவழிப்பு வருமானத்தில் 9.9% ஆக இருந்தது. இப்போது, அமெரிக்க தனிநபரின் செலவழிப்பு வருமானம் $66,100 ஆக உள்ள நிலையில், தங்கத்தின் தற்போதைய விலை $3,745, அதாவது தனிநபர் வருமானத்தில் 5.6% மட்டுமே.

இந்த விகிதத்தை (9.9%) அடைய, தங்கத்தின் விலை $6,571 ஆக உயர வேண்டும். எனவே, $6,600 என்பது தற்போதைய சந்தையின் உச்சத்திற்கு ஏற்ப இது ஒரு நியாயமான இலக்கு என்று வுட் தனது முதலீட்டாளர் அறிக்கையில் தெரிவித்துள்ளார்.

தங்கம் மீதான முதலீட்டு உத்தி கிறிஸ்டோபர் வுட், தான் நிர்வகிக்கும் அமெரிக்க டாலர் அடிப்படையிலான ஓய்வூதிய நிதியத்தில், 2002-ஆம் ஆண்டு முதல் தங்கத்தில் குறைந்தபட்சம் 40% முதலீட்டைத் தொடர்ந்து பராமரித்து வருகிறார்.

2020 டிசம்பரில், இந்த முதலீடு 50% ஆக இருந்த நிலையில், பிட்காயின் மீதும் முதலீடு செய்யத் தொடங்கிய பிறகு அதை 40% ஆகக் குறைத்துக்கொண்டார்.
அடுத்தகட்ட கணிப்புகள் ஜூலியஸ் பேர் (Julius Baer) நிதி நிறுவனத்தின் ஆய்வாளர்கள், தற்போதைய தங்கத்தின் விலை உயர்வுக்கு உலக மத்திய வங்கிகளே முக்கிய காரணமாக இருக்கலாம் என்று நம்புகின்றனர்.

குறுகிய மற்றும் நடுத்தர காலத்தில், தங்கத்தின் விலை அவுன்ஸ் ஒன்றுக்கு $4,500 முதல் $4,800 வரை உயர வாய்ப்புள்ளது என்று தொழில்நுட்ப விளக்கப்படங்கள் காட்டுவதாகவும் அவர்கள் தெரிவித்தனர். அதேபோல், வெள்ளியின் விலை $52 முதல் $58 வரை உயரக்கூடும் என்றும் அவர்கள் கணித்துள்ளனர்.