ஈரானிய கச்சா எண்ணெயை வாங்கும் இந்திய நிறுவனங்கள்

ஈரானுக்கு எதிரான அமெரிக்க-இஸ்ரேலியப் போரினால் ஏற்பட்ட எரிசக்தி நெருக்கடியைத் தணிப்பதற்காக, அமெரிக்கா, தற்காலிகமாக அதன் தடைகளைத் தளர்த்தியதைத் தொடர்ந்து, இந்திய சுத்திகரிப்பு நிறுவனங்கள் ஈரானிய எண்ணெயை மீண்டும் வாங்கத் திட்டமிட்டுள்ளதாக ராய்ட்டர்ஸ் செய்தி நிறுவனம் தெரிவித்துள்ளது.

இதற்கிடையில், மற்ற ஆசிய நாடுகளின் சுத்திகரிப்பு நிறுவனங்களும் இதே போன்ற நடவடிக்கைகளை ஆராய்ந்து வருகின்றன. மேற்கு ஆசியாவில் ஏற்பட்ட மோதல், கப்பல் போக்குவரத்துப் பாதைகளைச் சீர்குலைத்து, எண்ணெய் விநியோகத்திற்கு அச்சுறுத்தலாக அமைந்து, முக்கிய எரிசக்தி இறக்குமதி நாடுகளை மாற்று விநியோகங்களைத் தேட நிர்பந்தித்த நிலையில், இந்த ஆர்வம் மீண்டும் எழுந்துள்ளது.

ஈரானிய எண்ணெயை வாங்கவிருப்பதாகவும், பணம் செலுத்தும் விதிமுறைகள் போன்ற விவரங்கள் குறித்து அரசாங்கத்திடமிருந்து மேலதிக வழிகாட்டுதல்களையும், அமெரிக்காவிடமிருந்து தெளிவுபடுத்தலையும் எதிர்பார்த்துக் காத்திருப்பதாகவும் இந்திய சுத்திகரிப்பு நிறுவன அதிகாரிகள் கூறியதாக அந்த செய்தி நிறுவனம் தெரிவித்துள்ளது.

ஈரானிய எண்ணெய் மீதான இந்த சமீபத்திய தடை விலக்கானது, ரஷ்ய கச்சா எண்ணெய் மீது டிரம்ப் நிர்வாகம் எடுத்த இதே போன்ற நடவடிக்கையைத் தொடர்ந்து வந்துள்ளது. முன்னதாக, டேங்கர்களில் ஏற்கனவே ஏற்றப்பட்ட ரஷ்ய எண்ணெய் விநியோகங்களுக்கு, அமெரிக்கா விதித்த தடை 30 நாட்களுக்குப் பொருந்தாது என்று வாஷிங்டன் அறிவித்திருந்தது.

வியாழக்கிழமை (மார்ச் 12) முதல் டேங்கர்களில் ஏற்றப்பட்ட ரஷ்ய எண்ணெய் விநியோகங்களுக்கு 30 நாட்களுக்கு அமெரிக்கத் தடைகள் பொருந்தாது என்று அமெரிக்க கருவூலச் செயலாளர் ஸ்காட் பெசென்ட் X தளத்தில் தெரிவித்தார்.

மற்ற முக்கிய ஆசிய எண்ணெய் இறக்குமதியாளர்களை விட மிகக் குறைவான கச்சா எண்ணெய் கையிருப்பைக் கொண்டுள்ள இந்தியாவில் உள்ள சுத்திகரிப்பாளர்கள், இந்த மாத தொடக்கத்தில் அமெரிக்கா தற்காலிகமாகத் தடைகளை நீக்கிய பிறகு ரஷ்ய எண்ணெயை முன்பதிவு செய்ய விரைந்தனர் என்று ராய்ட்டர்ஸ் செய்தி வெளியிட்டுள்ளது.

ஏற்கனவே கடலில் உள்ள டேங்கர்களில் உள்ள ஈரானிய எண்ணெயை வாங்குவதற்கு 30 நாள் தடை விலக்கு அளிக்கப்பட்டுள்ளது என்று ட்ரம்ப் நிர்வாகம் அறிவித்திருந்தது.

மார்ச் 19 அன்று எனர்ஜி ஆஸ்பெக்ட்ஸ் என்ற ஆலோசனை நிறுவனம், சுமார் 13 கோடி முதல் 14 கோடி பீப்பாய்கள் ஈரானிய எண்ணெய் தற்போது கடலில் உள்ள டேங்கர்களில் இருப்பதாக மதிப்பிட்டது.