வார்னர் பிரதர்ஸ் டிஸ்கவரியை வாங்கும் பாரமவுண்ட் ஸ்கைடான்ஸ்

வார்னர் பிரதர்ஸ் டிஸ்கவரியை வாங்குவதற்கான ஏலத் தொகையை நெட்ஃபிளிக்ஸ் உயர்த்த மறுத்ததை அடுத்து, பாரமவுண்ட் ஸ்கைடான்ஸ் நிறுவனம் இந்த போட்டியில் வெற்றியாளராக உருவெடுத்துள்ளது.

வார்னர் பிரதர்ஸ் டிஸ்கவரியை ஏலத்தில் எடுப்பதில் இருந்து விலகிச் செல்வதாக நெட்ஃபிளிக்ஸ் நிறுவனம் ராய்ட்டர்ஸிடம் உறுதிப்படுத்தியது. வார்னர் பிரதர்ஸின் நிர்வாகக் குழு விரைவில் நெட்ஃபிளிக்ஸ் ஒப்பந்தத்தை ரத்து செய்து விட்டு பாரமவுண்ட் ஸ்கைடான்ஸின் ஏலத்தை ஏற்றுக் கொள்ள வேண்டும்.

“எங்களின் நிர்வாகக் குழு, பாரமவுண்ட் இணைப்பு ஒப்பந்தத்தை ஏற்றுக் கொள்ள வாக்களித்தவுடன், அது எங்கள் பங்குதாரர்களுக்கு மிகப்பெரிய மதிப்பை உருவாக்கும்” என்று வார்னர் தலைமை நிர்வாக அதிகாரி டேவிட் ஜாஸ்லாவ் ஒரு அறிக்கையில் தெரிவித்தார்.

வார்னர் பிரதர்ஸின் ஸ்ட்ரீமிங் மற்றும் ஸ்டுடியோ சொத்துக்களை, நெட்ஃபிளிக்ஸ் ஒரு பங்குக்கு $27.75 என்ற விலையில் ஏலம் கேட்டிருந்த நிலையில், பாரமவுண்ட் ஸ்கைடான்ஸ் பங்கு ஒன்றுக்கு $31 விலையில் ஏலம் கேட்டுள்ளது சிறந்தது என்று வார்னர் பிரதர்ஸ் கூறியது.

பெயர் குறிப்பிட விரும்பாத நிலையில் பேசிய ஒரு நெட்ஃபிளிக்ஸ் ஆலோசகர், இந்த ஒப்பந்தம் இனி பொருளாதார ரீதியாக அர்த்தமுள்ளதாக இல்லாததால், நெட்ஃபிளிக்ஸ் இந்த ஏலத்தில் இருந்து விலக வேண்டும் என்று பரிந்துரைத்ததாகக் கூறினார். நெட்ஃபிளிக்ஸ் இணை-தலைமை நிர்வாக அதிகாரி டெட் சரண்டோஸ், பிப்ரவரி 20 அன்று ஃபாக்ஸ் நியூஸின் லிஸ் கிளாமனுக்கு அளித்த பேட்டியில், ஸ்ட்ரீமிங் நிறுவனமான நெட்ஃபிளிக்ஸ் அதன் ஏலத்தை கணிசமாக உயர்த்தாது என்று சூசகமாகக் கூறினார்.

வார்னர் பிரதர்ஸ் நிறுவனத்துடன் பாரமவுண்ட் இணைவது இரண்டு பெரிய ஹாலிவுட் ஸ்டுடியோக்கள், இரண்டு ஸ்ட்ரீமிங் தளங்கள் (HBO Max மற்றும் Paramount+) மற்றும் இரண்டு செய்தி நிறுவனங்கள் (CNN மற்றும் CBS) ஆகியவற்றை ஒன்றிணைக்கும்.

இந்த ஒப்பந்தம் ஒழுங்குமுறை ஆணையத்தின் ஒப்புதலைப் பெறத் தவறினால், பாரமவுண்ட் செலுத்த வேண்டிய அபராத கட்டணத்தை $580 கோடியில் இருந்து $700 கோடியாக உயர்த்த, அதன் திருத்தப்பட்ட ஏலத்தில் பாரமவுண்ட் உறுதியளித்துள்ளது. இணைப்பு ஒப்பந்தத்திலிருந்து விலகியதற்காக வார்னர் பிரதர்ஸ், நெட்ஃபிளிக்ஸுக்கு செலுத்த வேண்டிய $280 கோடி அபராத கட்டணத்தையும் ஈடுகட்ட ஒப்புக்கொண்டது.