ஆந்த்ரோபிக் AI அச்சுறுத்தலால் ஐ.டி நிறுவன பங்குகள் பெரும் வீழ்ச்சி

ஆந்த்ரோபிக்கின் கிளாட் கோவொர்க் பிளக்-இன்கள் போன்ற முகவர் அடிப்படையிலான செயற்கை நுண்ணறிவு கருவிகள், முக்கிய நிறுவனச் செயல்முறைகளை ஆட்டோமேட்டிக் முறைக்கு மாற்றி, பாரம்பரிய SaaS மாடலை சீர்குலைத்துவிடும் என்ற அச்சம், உலகளாவிய ஐ.டி பங்குகளில் ஒரு பெரும் விற்பனைக்கு வழிவகுத்தது. இது அமெரிக்க மென்பொருள் நிறுவனங்களின் பங்குகளைக் கீழே இழுத்ததுடன், இந்திய ஐடி நிறுவனங்களின் சந்தை மதிப்பில் ₹2 லட்சம் கோடிக்கும் மேல் இழப்பை ஏற்படுத்தியது. இருப்பினும், இந்தியத் தொழில்துறைத் தலைவர்கள், இதன் தாக்கம், குறுகிய காலத்தில் சீர்குலைப்பதாக இல்லாமல், படிப்படியான மாற்றமாகவே இருக்கும் என்று வாதிடுகின்றனர்.
செவ்வாயன்று, ஃப்ரெஷ்வொர்க்ஸ் பங்குகள் முந்தைய நாளின் இறுதி விலையிலிருந்து 10.6 சதவீதம் சரிந்து, $9.53-ல் முடிவடைந்தன. சேல்ஸ்ஃபோர்ஸ் பங்குகள் 6.85 சதவீதம் சரிந்து $196.38-ல் முடிவடைந்தன. அதே சமயம் சர்வீஸ்நவ் பங்குகள் 6.97 சதவீதம் சரிந்து $109.77 ஆக சரிந்தது.
இதற்கிடையில், ஆந்த்ரோபிக் புதிய பணியிட உற்பத்தித்திறன் கருவிகளை அறிமுகப்படுத்தியதைத் தொடர்ந்து, செயற்கை நுண்ணறிவின் தாக்கம் குறித்த அதிகரித்து வரும் கவலைகளால், நிஃப்டி ஐடி குறியீடு கிட்டத்தட்ட 6 சதவீதம் சரிந்தது. இது கடந்த ஆறு ஆண்டுகளில் அதன் மிக மோசமான சரிவாகும். இந்த நிகழ்வு அமெரிக்க தொழில்நுட்பப் பங்குகளில் ஒரே இரவில் ஒரு பெரும் விற்பனையையும் தூண்டியது. அதன் விளைவுகள் ஐரோப்பிய மற்றும் ஆசிய சந்தைகளிலும் எதிரொலித்தன.
பாலந்தீர் நிறுவனத்தின் தலைமை தொழில்நுட்ப அதிகாரி ஷியாம் சங்கர், நிறுவனத்தின் செயற்கை நுண்ணறிவு மூலம் இயங்கும் ஃபார்வர்டு-டெப்ளாய்டு இன்ஜினியர் (AI FDE) கருவி முலம், “சிக்கலான SAP ERP இடமாற்றங்களை” முடிக்க ஆகும் காலத்தை, பல ஆண்டுகளிலிருந்து இரண்டு வாரங்களாகக் குறைக்க முடியும் என்று தெரிவித்தார். பெரிய நிறுவனங்களில் இதற்கு முன்பு பொதுவாக இரண்டு ஆண்டுகள் ஆகும். இது SaaS வணிக மாதிரியின் நீண்ட கால நிலைத்தன்மை குறித்து முதலீட்டாளர்கள் மத்தியில் கவலைகளைத் தூண்டியுள்ளது.
தொழில்துறை மூத்த நிபுணரும், ஹேப்பியஸ்ட் மைண்ட்ஸ் டெக்னாலஜிஸின் தலைவர் மற்றும் தலைமை வழிகாட்டியுமான அசோக் சூட்டா, இந்த முன்னேற்றங்கள் தங்கள் நிறுவனத்திற்கு ஒரு குறிப்பிடத்தக்க வாய்ப்பை வழங்குகின்றன என்று குறிப்பிட்டார்.