அரசு தங்கப் பத்திரங்கள் மீதான மூலதன ஆதாய வரி விலக்கு ரத்து
அரசாங்க தங்கப் பத்திரங்கள் மீதான மூலதன ஆதாய வரி விலக்கு, அந்தப் பத்திரங்கள் ஒரு தனி நபரால் அதன் அசல் வெளியீட்டின் போது வாங்கப்பட்டு, முதிர்வு காலத்தில் மீட்கப்படும் வரை தொடர்ச்சியாக வைத்திருக்கப்பட்டால் மட்டுமே கிடைக்கும் என்று மத்திய பட்ஜெட்டில் அறிவிக்கப்பட்டுள்ளது.
இந்த வரி விலக்கு, இந்திய ரிசர்வ் வங்கியால் வெளியிடப்படும் அனைத்து சவரன் தங்கப் பத்திரங்களுக்கும் ஒரே சீராகப் பொருந்தும் என்றும் அறிவிக்கப்பட்டுள்ளது.
இந்திய ரிசர்வ் வங்கியால் வெளியிடப்பட்ட அரசாங்க தங்கப் பத்திரங்களை மீட்பதன் மூலம் கிடைக்கும் மூலதன ஆதாயங்களுக்கு, வருமான வரிச் சட்டம், 2025-இன் பிரிவு 70(1)(x)-இன் விதிகளின் கீழ், வரி விலக்கு அளிக்கப்படுகின்றது.
இது குறித்து கருத்து தெரிவித்துள்ள நங்கியா & கோ எல்எல்பி நிறுவனத்தின் பங்குதாரர் நீரஜ் அகர்வாலா, “2026 பட்ஜெட் அறிவிப்புகளின் படி, அரசாங்க தங்கப் பத்திரங்களை (SGBs) முதிர்வு காலத்தில் மீட்கும்போது கிடைக்கும் வரி விலக்கு, அந்தப் பத்திரங்கள் அரசாங்கத்தால் ஆரம்பத்தில் வெளியிடப்படும் போதே வாங்கப்பட்டிருந்தால் மட்டுமே தொடர்ந்து கிடைக்கும்.
இந்த மாற்றம் முதன்மையாக, இரண்டாம் நிலை சந்தையில் சவரன் தங்கப் பத்திரங்களை வாங்கும் முதலீட்டாளர்களைப் பாதிக்கிறது. இதில் அசல் வெளியீட்டு நிலையில் வாங்காமல், பணப்புழக்கம் அல்லது விலை வேறுபாட்டைப் பயன்படுத்தி லாபம் ஈட்டுவதற்காக இந்தப் பத்திரங்களை வாங்கும் தனி நபர்களும் அடங்குவர். இந்த முதலீட்டாளர்கள் பத்திரங்களின் அசல் சந்தாதாரர்கள் இல்லாததால், வாங்கிய விலைக்கும் மீட்பு மதிப்புக்கும் இடையிலான வித்தியாசத்தின் மீது, முதிர்வு காலத்தில் வரி விதிக்கப்பட உள்ளது” என்று கூறியுள்ளார்.
இந்தத் திருத்தத்தின் நோக்கம், வரிச் சலுகையை அசல் முதலீட்டுத் திட்டத்துடன் இணைப்பது மற்றும் இரண்டாம் நிலை சந்தை பரிவர்த்தனைகளுக்கு எதிர்பாராத விதமாக வரி விலக்கு நீட்டிக்கப்படுவதைத் தடுப்பதாகும். அதே நேரத்தில், ஆரம்ப வெளியீட்டில் பங்கேற்கும் நீண்ட கால முதலீட்டாளர்களுக்கான ஊக்கத்தொகையைப் பாதுகாப்பதாகும் என்று அவர் கூறினார்.
திருத்தப்பட்ட இந்த விதி, குறிப்பிட்ட நிபந்தனைகள் பூர்த்தி செய்யப்படுவதற்கு உட்பட்டு, பத்திரங்கள் எந்தத் தொடரில் வெளியிடப்பட்டன என்பதைப் பொருட்படுத்தாமல், இந்திய ரிசர்வ் வங்கியால் அவ்வப்போது வெளியிடப்படும் அனைத்து அரசாங்க தங்கப் பத்திரங்களுக்கும் ஒரே சீராகப் பொருந்தும்.
