பிப்ரவரியில் மொத்த விலைவாசி உயர்வு 2.13%ஆக அதிகரிப்பு

காய்கறி அல்லாத உணவுப் பொருட்களின் விலை உயர்வு காரணமாக, மொத்த விலை குறியீட்டின் (WPI) அடிப்படையில் கணக்கிடப்படும் மொத்த விலை பணவீக்கம், பிப்ரவரி மாதத்தில் 2.13 சதவீதமாக உயர்ந்ததாகத் தொழில் துறை அமைச்சகம் தெரிவித்தது. இது தொடர்ந்து நான்காவது மாதமாக ஏற்பட்டுள்ள உயர்வாகும். ஜனவரி மாதத்தில் மொத்த விலை பணவீக்கம் 1.81 சதவீதமாக இருந்தது.

“பிப்ரவரி 2026-இல் பண வீக்கம் நேர் மறையான விகிதத்தில் உயர்ந்ததற்கு முக்கியக் காரணம், பிற உற்பத்தித் துறைகள், அடிப்படை உலோக உற்பத்தி, உணவு அல்லாத பொருட்கள், உணவுப் பொருட்கள் மற்றும் ஜவுளி உள்ளிட்டவற்றின் விலைகளில் ஏற்பட்ட அதிகரிப்பே ஆகும்,” என்று தொழில் துறை அமைச்சகம் ஒரு அறிக்கையில் குறிப்பிட்டது. WPI தரவுகளின்படி, உணவுப் பொருட்களுக்கான பண வீக்கம் முந்தைய மாதத்தில் 1.55 சதவீதமாக இருந்த நிலையில், பிப்ரவரி மாதத்தில் அது 2.19 சதவீதமாக உயர்ந்தது.

காய்கறிகளைப் பொறுத்தவரை, ஜனவரி மாதத்தில் 6.78 சதவீதமாக இருந்த பண வீக்கம், பிப்ரவரி மாதத்தில் குறைந்து 4.73 சதவீதமாகப் பதிவானது. இருப்பினும், பருப்பு வகைகள், உருளைக்கிழங்கு, முட்டை, இறைச்சி மற்றும் மீன் ஆகியவற்றின் பணவீக்க விகிதம், முந்தைய மாதத்துடன் ஒப்பிடுகையில் பிப்ரவரி மாதத்தில் சற்று அதிகரித்துள்ளது.

உற்பத்தி செய்யப்பட்ட பொருட்களின் பிரிவில், WPI பணவீக்கம் முந்தைய மாதத்தில் 2.86 சதவீதமாக இருந்த நிலையில், பிப்ரவரி மாதத்தில் அது சற்று உயர்ந்து 2.92 சதவீதமாகப் பதிவானது. உணவு அல்லாத பொருட்களின் பிரிவில் பணவீக்கம் ஜனவரி மாதத்தில் 7.58 சதவீதமாக இருந்த நிலையில், பிப்ரவரி மாதத்தில் அது கணிசமாக உயர்ந்து 8.80 சதவீதத்தை எட்டியது. எரிபொருள் மற்றும் மின்சக்திப் பிரிவில் எதிர்மறைப் பணவீக்கம் (அல்லது பணவாட்டம்) தொடர்ந்து நீடித்தது; ஜனவரி மாதத்தில் 4.01 சதவீதமாக இருந்த இது, பிப்ரவரி மாதத்தில் 3.78 சதவீதமாகப் பதிவானது.

அடிப்படை வட்டி விகிதங்களைத் தீர்மானிப்பதற்கு, இந்திய ரிசர்வ் வங்கி (RBI) முதன்மையாக சில்லறைப் பணவீக்கத்தையே (Retail Inflation) கண்காணித்து வருகிறது என்பது குறிப்பிடத்தக்கது.