ஆல்ஃபாபெட்டில் பெர்க்ஷயர் ஹாதவேவின் முதலீடு மும்மடங்கு அதிகரிப்பு

பெர்க்ஷயர் ஹாதவே நிறுவனத்தின் தலைமைச் செயல் அதிகாரி பொறுப்பை ஏற்ற கிரெக் ஏபெல், அப்பதவியில் நிலைபெற்றதைத் தொடர்ந்து, கூகிளின் தாய் நிறுவனத்தில் அதன் முதலீட்டை மும்மடங்குக்கும் மேலாக அதிகரித்ததுடன், 260 கோடி டாலருக்கும் அதிகமான மதிப்புள்ள டெல்டா ஏர்லைன்ஸ் பங்குகளையும் வாங்கியது.

மேலும், வாரன் பஃபெட் தனது முதலீட்டுத் தொகுப்பை நிர்வகிக்கப் பணியமர்த்திய இரண்டு முதலீட்டு மேலாளர்களில் ஒருவரான டாட் காம்ப்ஸ் கடந்த ஆண்டு இறுதியில் வெளியேறியதைத் தொடர்ந்து, இந்த பெருநிறுவனம் விசா, மாஸ்டர்கார்டு, டோமினோஸ் பிஸ்ஸா, அமேசான் மற்றும் யுனைடெட் ஹெல்த்கேர் உள்ளிட்ட பல பங்குகளையும் விற்றுவிட்டது.

தொழில்நுட்ப நிறுவனங்களில் முதலீடு செய்ய வாரன் பஃபெட் எப்போதும் தயக்கம் காட்டி வந்தார். ஏனெனில் நீண்ட கால வெற்றியாளர்களைக் கணிக்கும் அளவுக்கு அந்த நிறுவனங்களைப் பற்றி தனக்கு நன்கு தெரியாது என்று அவர் கூறினார். இருப்பினும், நுகர்வோர் ஆப்பிள் நிறுவனத்தின் ஐபோன்கள் மற்றும் கணினிகள் மீது எவ்வளவு பற்றுடன் இருக்கிறார்கள் என்பதை உணர்ந்த பிறகு, தனது தொழில் வாழ்க்கையின் இறுதிக் கட்டத்தில் ஆப்பிள் நிறுவனத்தின் மிகப்பெரிய பங்குகளை வாங்கியதன் மூலம வாரன் பஃபெட் அந்த விதிக்கு ஒரு விதிவிலக்கு அளித்தார்.

ஏபெல் இப்போது மிகவும் சௌகரியமாக இருப்பதாகத் தெரிகிறது. ஏனெனில் மார்ச் மாத இறுதிக்குள் பெர்க்ஷயர் நிறுவனம் கிட்டத்தட்ட 1,700 கோடி டாலர் மதிப்புள்ள சுமார் 5.8 கோடி ஆல்ஃபபெட் பங்குகளை வைத்திருந்தது. வெறும் மூன்று மாதங்களுக்கு முன்பு, பெர்க்ஷயர் $560 கோடி மதிப்புள்ள 1.78 கோடி ஆல்பாபெட் பங்குகளை மட்டுமே வைத்திருந்தது.

இந்த ஆண்டின் முதல் மூன்று மாதங்களில் பெர்க்ஷயர் கிட்டத்தட்ட 4 கோடி டெல்டா பங்குகளை வாங்கியது. பல ஆண்டுகளாக விமான நிறுவன முதலீடுகளில் பஃபெட்டிற்கு ஒரு மோசமான வரலாறு உண்டு; அவர் ஒன்றுக்கு மேற்பட்ட முறை அவற்றின் பங்குகளை பெருமளவில் வாங்கி, இறுதியில் அவற்றை விற்றுத் தீர்த்துள்ளார்.

மேலும் பெர்க்ஷயர், மேசிஸ் நிறுவனத்தில் ஒரு சிறிய புதிய பங்கையும் நிறுவியது, அதன் மதிப்பு மார்ச் மாத இறுதியில் கிட்டத்தட்ட $5.5 கோடி ஆகும்.