S&P-யிடமிருந்து முதல் ‘BBB-‘ முதலீட்டுத் தர மதிப்பீட்டைப் பெற்ற ஃபெடரல் வங்கி
தனியார் துறை வங்கியான ஃபெடரல் வங்கி, S&P குளோபல் ரேட்டிங்ஸ் நிறுவனத்திடமிருந்து அதன் முதல் சர்வதேச கடன் வழங்குநர் மதிப்பீட்டைப் பெற்றுள்ளதாக அறிவித்தது. இதன்படி, நீண்ட காலத்திற்கு ‘BBB-/நிலையானது’ (Stable) மற்றும் குறுகிய காலத்திற்கு ‘A-3’ ஆகிய மதிப்பீடுகள் வழங்கப்பட்டுள்ளன; இது இவ்வங்கியை உலகளாவிய முதலீட்டுத் தர பிரிவில் இடம்பெறச் செய்துள்ளது.
S&P குளோபல் ரேட்டிங்ஸ் நிறுவனத்தால் இவ்வங்கிக்கு வழங்கப்பட்ட முதல் சர்வதேச கடன் வழங்குநர் மதிப்பீடு இதுவாகும்.
வங்கியின் வணிக வலிமை, ஒழுங்குமுறைக்குட்பட்ட இடர் மேலாண்மை, வலுவான மூலதன நிலை, பன்முகப்படுத்தப்பட்ட நிதி ஆதாரங்கள், பணப்புழக்க நிலை மற்றும் சீரான நிதிச் செயல்பாடு ஆகியவற்றை இந்த மதிப்பீடு பிரதிபலிக்கிறது என்று வங்கி வெளியிட்ட அறிக்கையில் தெரிவிக்கப்பட்டுள்ளது.
மேலும், இந்த முதலீட்டுத் தர மதிப்பீடு உலகளாவிய முதலீட்டாளர்கள் மற்றும் சர்வதேச நிதி நிறுவனங்களிடையே வங்கியின் மீதான கவனத்தை அதிகரிக்கும் என்றும், அதே வேளையில் வாடிக்கையாளர்கள், வணிகப் பங்காளிகள் மற்றும் பிற பங்குதாரர்களிடையே நம்பிக்கையை வலுப்படுத்தும் என்றும் வங்கி கூறியது.
“S&P குளோபல் ரேட்டிங்ஸ் நிறுவனத்திடமிருந்து எமக்குக் கிடைத்துள்ள இந்த முதல் சர்வதேச முதலீட்டுத் தர மதிப்பீடு, ஃபெடரல் வங்கிக்கு ஒரு முக்கியமான மைல்கல்லாகும். இது எங்கள் வணிகத்தின் வலிமை, வணிக மாதிரியின் உறுதித்தன்மை மற்றும் வளர்ச்சி, இடர் மேலாண்மை மற்றும் நிர்வாகம் ஆகியவற்றில் நாங்கள் கடைப்பிடிக்கும் ஒழுங்குமுறை அணுகுமுறை ஆகியவற்றை பிரதிபலிக்கிறது” என்று ஃபெடரல் வங்கியின் நிர்வாக இயக்குநரும் தலைமை நிர்வாக அதிகாரியுமான கே.வி.எஸ். மணியன் கூறினார்.
வலுவான நிதி அடிப்படைகளைத் தக்கவைத்துக்கொண்டு, வாடிக்கையாளர் சேவை, நிலையான வளர்ச்சி மற்றும் நீண்ட கால மதிப்பு உருவாக்கம் ஆகியவற்றில் வங்கி கவனம் செலுத்தி வரும் நிலையில், அதன் வளர்ச்சிப் பயணத்தின் ஒரு முக்கிய கட்டத்தில் இந்த மதிப்பீடு கிடைத்துள்ளதாக அவர் குறிப்பிட்டார்.
கடன்களின் (liabilities) தரத்தை மேம்படுத்துதல், ஆரோக்கியமான மூலதன இருப்பைத் தக்கவைத்தல், லாபத்தை அதிகரித்தல் மற்றும் தொழில்நுட்பம் மற்றும் வாடிக்கையாளர் அனுபவத்தில் தொடர்ந்து முதலீடு செய்தல் ஆகியவற்றின் மூலம் பல ஆண்டுகளாகத் தனது இருப்புநிலைக் குறிப்பை (balance sheet) வலுப்படுத்தியுள்ளதாக ஃபெடரல் வங்கி தெரிவித்துள்ளது. உறுதியான மற்றும் நிலையான வங்கி வணிகத்தை உருவாக்குவதில் வங்கி அடைந்துள்ள முன்னேற்றத்தை இந்த முதலீட்டுத் தர மதிப்பீடு பிரதிபலிக்கிறது என்றும் அது கூறியது.
