வால் ஸ்ட்ரீட் ஜர்னலுக்கு எதிராக டிரம்ப் தொடர்ந்த வழக்கு தள்ளுபடி

செல்வந்த நிதியாளர் ஜெஃப்ரி எப்ஸ்டீனுடனான தனது தொடர்புகள் குறித்து செய்தி வெளியிட்டதற்காக, தி வால் ஸ்ட்ரீட் ஜர்னல் மற்றும் ஊடக அதிபர் ரூபர்ட் முர்டோக்கிற்கு எதிராக அமெரிக்க அதிபர் டொனால்ட் டிரம்ப் தொடர்ந்த பல நூறு கோடி டாலர் வழக்கை ஒரு மத்திய நீதிபதி தள்ளுபடி செய்துள்ளார்.

மியாமியில் உள்ள அமெரிக்க மாவட்ட நீதிபதி டாரின் கெய்ல்ஸ், பிரதிவாதிகள் உண்மையான தீய எண்ணத்துடன் அவதூறான அறிக்கைகளை வெளியிட்டனர் என்பதை அதிபர் நிரூபிக்கவில்லை என்று தீர்ப்பளித்து, இந்த வழக்கை பாரபட்சத்துடன் தள்ளுபடி செய்தார்.

ஜர்னலின் புலனாய்வு அறிக்கையில் குறைபாடுகளை “உருவாக்க” முயற்சிப்பதால், இந்த வழக்கு “ஆதாரமற்ற வாதங்களை முன்வைக்கிறது” என்று அந்தத் தீர்ப்பு கூறியது.

ஒரு வழக்கு “பாரபட்சத்துடன்” தள்ளுபடி செய்யப்படும்போது, அதை மீண்டும் தாக்கல் செய்ய முடியாது. மேலும் அந்தத் தள்ளுபடி நிரந்தரமானது மற்றும் மறுக்க முடியாதது.

கடந்த ஆண்டு ஜர்னல் வெளியிட்ட ஒரு செய்தியில், எப்ஸ்டீனின் 50வது பிறந்தநாளுக்காக 2003-ல் தொகுக்கப்பட்ட ஒரு ஆல்பத்தில் டிரம்பின் பெயர் இடம்பெற்றிருந்ததாகவும், பாலியல் ரீதியாகத் தூண்டும் ஒரு கடிதத்தைப் பற்றி அந்தப் பத்திரிகை விவரித்திருந்தது.

2006-ல் எப்ஸ்டீன் முதன்முதலில் கைது செய்யப்பட்டு, பின்னர் டிரம்புடன் கருத்து வேறுபாடு ஏற்படுவதற்குப் பல ஆண்டுகளுக்கு முன்பே, அவப்பெயர் பெற்ற பிரிட்டிஷ் சமூகப் பிரமுகரான கிஸ்லைன் மேக்ஸ்வெல், அவருக்கான பிறந்தநாள் ஆல்பத்தின் ஒரு பகுதியாக இந்தக் கடிதத்தைச் சேகரித்ததாகக் கூறப்படுகிறது.

டிரம்பின் பெயர் இடம்பெற்றுள்ள அந்தக் கடிதத்தில், கையால் வரையப்பட்ட நிர்வாணப் பெண் போன்ற உருவத்தின் வெளிப்புறக் கோட்டுடன் கூடிய வாசகங்கள் இடம்பெற்றுள்ளன என்றும், அது “பிறந்தநாள் வாழ்த்துக்கள் — ஒவ்வொரு நாளும் மற்றொரு அற்புதமான ரகசியமாக அமையட்டும்” என்று முடிவடைகிறது என்றும் அந்தச் செய்தித்தாள் கூறுகிறது.

அதை எழுதியதை டிரம்ப் மறுத்ததோடு, அந்தச் செய்தியை “பொய்யானது, தீங்கிழைக்கும் நோக்கம் கொண்டது, மற்றும் அவதூறானது” என்றும் கூறினார்.

மியாமியில் உள்ள மத்திய நீதிமன்றத்தில் தாக்கல் செய்யப்பட்ட இந்த வழக்கில், அந்தப் பத்திரிகையும் அதன் நிருபர்களும் “தெரிந்தும் பொறுப்பற்ற முறையிலும்” “ஏராளமான பொய்யான, அவதூறான, மற்றும் இழிவுபடுத்தும் அறிக்கைகளை” வெளியிட்டதாகக் குற்றம் சாட்டப்பட்டுள்ளது. இது ஜனாதிபதிக்கு “மிகப்பெரிய நிதி மற்றும் நற்பெயர் பாதிப்பை” ஏற்படுத்தியதாகவும் அது கூறியுள்ளது.