பெட்ரோலில் எத்தனால் கலப்பு விகிதத்தை 21%ஆக உயர்த்த திட்டம்

பெட்ரோலில் எத்தனால் கலப்பு விகிதத்தை, தற்போதுள்ள 20 சதவீதத்திலிருந்து 21 சதவீதமாக இந்தியா உயர்த்தக்கூடும் என்று மத்திய அரசாங்கம் குறிப்பிட்டுள்ளது.

இந்திய தர நிர்ணய அமைப்பை (BIS) மேற்கோள் காட்டி, கனரகத் தொழில்கள் அமைச்சகத்தின் (MHI) கூடுதல் செயலாளர் ஹனீஃப் குரேஷி, ‘E21’ (21 சதவீத எத்தனால் கலப்பு) சாத்தியமே என்று தெரிவித்தார்.

மேற்கு ஆசியா குறித்த அமைச்சகங்களுக்கு இடையிலான விளக்கக் கூட்டத்தில் திங்களன்று பேசிய அவர், “உயிரி எரிபொருட்களை (biofuels) முடிந்தவரை பயன்படுத்துவதில் அரசாங்கம் உறுதியாக உள்ளது; ‘E20’ (20 சதவீத கலப்பு) இலக்கு ஏற்கனவே எட்டப்பட்டுவிட்டது. எத்தனால் கலப்பு விகிதத்தில் +/- 1 சதவீதம் வரை மாறுபாடு இருக்கலாம் என்று BIS ஏற்கனவே கூறியுள்ளது. எனவே, சுமார் 21 சதவீதம் வரையிலான அளவை எட்ட முடியும்,” என்று கூறினார்.

எத்தனால் கலந்த பெட்ரோல் (EBP) திட்டம், இந்தியா ஆண்டுதோறும் சுமார் 60 லட்சம் டன் அல்லது ஏறக்குறைய 4.4 கோடி பீப்பாய்கள் அளவிலான எரிபொருளைச் சேமிக்க உதவியுள்ளது. கடந்த 10 ஆண்டுகளில், இத்திட்டத்தின் மூலம் 1.8 கோடி டன்னுக்கும் அதிகமான கச்சா எண்ணெய் இறக்குமதி தவிர்க்கப்பட்டுள்ளது; இதன் மூலம் ரூ.1.36 லட்சம் கோடி அளவிலான அந்நியச் செலாவணி சேமிக்கப்பட்டுள்ளது.

கச்சா எண்ணெய் இறக்குமதியைச் சார்ந்திருப்பதைக் குறைப்பதற்கான மற்றொரு வழிமுறை, ‘ஃப்ளெக்ஸ் ஃப்யூல்’ (flex fuel) வாகனங்கள் ஆகும் என்றும் குரேஷி சுட்டிக்காட்டினார்.

“ஃப்ளெக்ஸ் ஃப்யூல் குறித்த ஒரு திட்டமும் செயல்பாட்டில் உள்ளது; இத்துறையைச் சார்ந்த நிறுவனங்கள் ஏற்கனவே ஃப்ளெக்ஸ் ஃப்யூல் பயன்பாட்டிற்கு ஏற்ற வாகன மாதிரிகளை வடிவமைத்து வெளியிட்டுள்ளன. ஃப்ளெக்ஸ் ஃப்யூல் என்பது E20 முதல் E85 வரையிலான எத்தனால் கலப்பு விகிதங்களைக் குறிக்கும். வாகனங்களின் என்ஜின்கள், செயல்திறனில் எவ்விதக் குறைவும் ஏற்படாமல் இந்த அளவிலான எத்தனால் கலப்பை ஏற்றுக்கொண்டு இயங்கும் திறன் கொண்டவை. எனவே, ஃப்ளெக்ஸ் ஃப்யூல் மூலம் இயங்கக்கூடிய நான்கு சக்கர மற்றும் இரு சக்கர வாகனங்களின் மேம்பாட்டை நாம் தற்போது காண்கிறோம் ” என்று அவர் கூறினார்.

21 சதவீத எத்தனால் கலப்பு இலக்கை எட்டத் தேவையான கூடுதல் எத்தனால் அளவை, உள்நாட்டு ஆதாரங்கள் மூலமே எளிதாகப் பூர்த்தி செய்ய முடியும்.