தளக் கட்டணத்தை ரூ.17.58ஆக உயர்த்திய ஸ்விக்கி
உணவு விநியோகத் தளமான ஸ்விக்கி, அதன் பயனர்களிடம் வசூலிக்கும் தளக் கட்டணத்தை ஒரு ஆர்டருக்கு ரூ.17.58 ஆக உயர்த்தியுள்ளது. போட்டியாளரான ஸொமேட்டோ கட்டணத்தை உயர்த்திய சில நாட்களுக்குப் பிறகு இந்த உயர்வு ஏற்பட்டுள்ளது.
ஸ்விக்கி கடைசியாக கடந்த ஆண்டு செப்டம்பர் மாதம் தனது தளக் கட்டணத்தை உயர்த்தியிருந்தது. தற்போது அந்நிறுவனம், ஜிஎஸ்டி உட்பட ஒரு ஆர்டருக்கு ரூ.17.58 ஆக கட்டணத்தை உயர்த்தியுள்ளது. அதே சமயம், போட்டியாளரான ஸொமேட்டோ ஜிஎஸ்டிக்கு முந்தைய அடிப்படையில் ரூ.14.90 வசூலிக்கிறது.
ஸ்விக்கியின் இந்த சமீபத்திய கட்டண உயர்வால், இரு உணவு விநியோக நிறுவனங்களும் வசூலிக்கும் தளக் கட்டணம் கிட்டத்தட்ட சமமாகியுள்ளது (ஒரு ஆர்டருக்கு சுமார் ரூ.17.58).
மார்ச் 20 அன்று, ஸொமேட்டோ தனது பயனர்களிடம் வசூலிக்கும் தளக் கட்டணத்தை ஜிஎஸ்டிக்கு முந்தைய அடிப்படையில் ஒரு ஆர்டருக்கு ரூ.2.40 உயர்த்தி ரூ.14.90 ஆக நிர்ணயித்தது.
தளக் கட்டணங்கள் என்பவை, டெலிவரி மற்றும் உணவகக் கட்டணங்களுடன் கூடுதலாக, ஒரு ஆர்டருக்கு வசூலிக்கப்படும் நிலையான கட்டணங்களாகும். இவை செயல்பாட்டுச் செலவுகள், தொழில்நுட்பப் பராமரிப்பு மற்றும் சேவைகளுக்கான வாடிக்கையாளர் ஆதரவு ஆகியவற்றை ஈடுகட்டப் பயன்படுத்தப்படுகின்றன.
சமீபத்திய தளக் கட்டண உயர்வானது, நாடு முழுவதும் உள்ள லட்சக்கணக்கான பயனர்களுக்கு உணவு ஆர்டர் செய்வதை அதிக செலவு மிக்கதாக மாற்ற உள்ளது. மேற்கு ஆசிய மோதல் காரணமாக கச்சா எண்ணெய் விலை உயர்ந்து வரும் வேளையில், ஸொமேட்டோ மற்றும் ஸ்விக்கியின் இந்தத் தளக் கட்டண உயர்வு வந்துள்ளது. எரிபொருள் விலை உயர்வால், விநியோகச் செயல்பாடுகளின் செலவும் அதிகரிக்கும் என எதிர்பார்க்கப்படுகிறது.
