டிரம்ப் நிர்வாகம்,உச்ச நீதிமன்றத்தில் அவசரமாக மனு தாக்கல் செய்துள்ளது

டிரம்ப் நிர்வாகம், அமெரிக்க காங்கிரஸ் அங்கீகரித்த பில்லியன் கணக்கான வெளிநாட்டு உதவிகளை முடக்குவதற்கு அனுமதி கோரி உச்ச நீதிமன்றத்தில் அவசரமாக மனு தாக்கல் செய்துள்ளது.

இந்த நடவடிக்கை, நிர்வாகம் தானாகவே நிதியைக் குறைக்க முடியாது என அமெரிக்க மேல்முறையீட்டு நீதிமன்றம் வெள்ளிக்கிழமை அளித்த தீர்ப்பைத் தொடர்ந்து வந்துள்ளது.

வெள்ளிக்கிழமை மேல்முறையீட்டு நீதிமன்றம் ஒரு கீழ் நீதிமன்றத்தின் தீர்ப்பைத் தடுக்க மறுத்துவிட்டது. அந்த தீர்ப்பின்படி, டிரம்ப் நிர்வாகம் பில்லியன் கணக்கான வெளிநாட்டு உதவிகளை தன்னிச்சையாக குறைக்க முடியாது.

மேலும், செப்டம்பர் மாதத்திற்குள் காங்கிரஸ் அங்கீகரித்த நிதியை செலவழிக்க வேண்டும் என்றும் கீழ் நீதிமன்றம் உத்தரவிட்டது.
டிரம்ப் தனது இரண்டாவது பதவிக் காலத்தில், ஜனவரி 20 அன்று, அனைத்து வெளிநாட்டு உதவிகளுக்கும் 90 நாள் இடைநிறுத்தத்தை விதித்தார்.

இந்த நிர்வாக உத்தரவுக்குப் பிறகு, அமெரிக்காவின் முக்கிய வெளிநாட்டு உதவி நிறுவனமான யுஎஸ்எய்ட் (USAID) கிட்டத்தட்ட கலைக்கப்பட்டது.
2024 ஆம் ஆண்டில் வெளிநாட்டு உதவிக்காக ஒதுக்கப்பட்ட நிதியில் $6.5 பில்லியன் நிதியை செலவழிக்க நிர்வாகம் திட்டமிட்டிருந்தாலும், யுஎஸ்எய்ட் நிறுவனத்திற்கு ஒதுக்கப்பட்ட $4 பில்லியன் நிதியை நிறுத்தி வைக்க முடிவு செய்தது.
இதனை எதிர்த்து நிவாரண குழுக்கள் வழக்கு தொடர்ந்தன.

அமெரிக்க மாவட்ட நீதிபதி அமீர் அலி தனது தீர்ப்பில், நிர்வாகம் நிதியை செலவழிக்காமல் இருக்க முடியாது என்றும், காங்கிரஸ் சட்டங்களை மாற்றாத வரை நிதி ஒதுக்கீடு சட்டங்களுக்கு இணங்க வேண்டும் என்றும் கூறினார்.

இந்த தீர்ப்பு மேல்முறையீட்டு செயல்முறை முழுவதும் நீடித்தால், டிரம்ப் காங்கிரஸ் அங்கீகரித்த நிதியை ரத்து செய்வதைத் தடுக்க முடியும். இந்த வழக்கு நடந்து கொண்டிருந்தபோது, டிரம்ப் $4 பில்லியன் சர்ச்சைக்குரிய நிதியை “பாக்கெட் ரசிஷன்” மூலம் தடுக்க முயன்றார்.

இது காங்கிரஸை புறக்கணிக்கும் ஒரு வழியாகும். இந்த சட்டப் போராட்டம் அமெரிக்காவின் நிர்வாக, சட்ட அமைப்புகளுக்கு இடையிலான அதிகாரப் போராட்டத்தை எடுத்துக்காட்டுகிறது.