அமேசானின் வரலாற்றில் மிகப்பெரிய ஆட்குறைப்பு..

சுமார் 30,000 கார்ப்பரேட் ஊழியர்களைக் குறைக்கும் அதன் பரந்த இலக்கின் ஒரு பகுதியாக, அமேசான் அடுத்த வாரம் இரண்டாவது சுற்று ஆட்குறைப்புக்குத் திட்டமிட்டுள்ளது.

ராய்ட்டர்ஸ் முதலில் தெரிவித்த 30,000 என்ற இலக்கில் பாதியான, சுமார் 14,000 நிர்வாகப் பணியிடங்களை அந்த நிறுவனம் கடந்த அக்டோபர் மாதம் குறைத்தது. இந்த முறை மொத்த எண்ணிக்கை கடந்த ஆண்டைப் போலவே இருக்கும் என்று கூறப்படுகிறது. இந்நிலையில் அமேசான் செய்தித் தொடர்பாளர் இது குறித்து கருத்து தெரிவிக்க மறுத்துவிட்டார்.

நிறுவனத்தின் அமேசான் வெப் சர்வீசஸ், சில்லறை வர்த்தகம், பிரைம் வீடியோ மற்றும் மக்கள் அனுபவம் மற்றும் தொழில்நுட்பம் என அழைக்கப்படும் மனிதவளப் பிரிவுகளில் உள்ள வேலைகள் பாதிக்கப்படக்கூடும் என்று கூறப்படுகிறது. இருப்பினும் அதன் முழுமையான நோக்கம் தெளிவாகத் தெரியவில்லை. அமேசானின் திட்டங்களின் விவரங்கள் மாறக்கூடும் என்றும் கூறப்படுகிறது.

சியாட்டில் உள்ள இந்த ஆன்லைன் சில்லறை வர்த்தக நிறுவனம், அக்டோபர் மாத ஆட்குறைப்பை செயற்கை நுண்ணறிவு மென்பொருளின் வளர்ச்சியுடன் தொடர்புபடுத்தியது. ஒரு உள் கடிதத்தில், “இந்தத் தலைமுறை செயற்கை நுண்ணறிவு என்பது இணையத்திற்குப் பிறகு நாம் கண்டிராத மிகவும் மாற்றியமைக்கும் தொழில்நுட்பமாகும். மேலும் இது நிறுவனங்களை முன்னெப்போதையும் விட மிக வேகமாகப் புதுமைகளை உருவாக்க உதவுகிறது” என்று கூறியது.

இருப்பினும், இதன் தலைமைச் செயல் அதிகாரி ஆண்டி ஜாஸ்ஸி ஆய்வாளர்களிடம், இந்த ஆட்குறைப்பு உண்மையில் நிதி சார்ந்ததல்ல, அது செயற்கை நுண்ணறிவு சார்ந்ததும் அல்ல என்று பின்னர் கூறினார். மாறாக, இது கலாச்சாரம் சார்ந்தது என்று கூறினார். அதாவது நிறுவனத்தில் தேவைக்கும் அதிகப்படியான ஊழியர்கள் மற்றும் பதவிகள் உள்ளன.

இந்த 30,000 பணியிடங்களும், அமேசானின் 15.8 லட்சம் ஊழியர்களில் ஒரு சிறிய பகுதியாக இருந்தாலும், இது அந்நிறுவனத்தின் கார்ப்பரேட் பணியாளர்களில் கிட்டத்தட்ட 10% ஆகும். அமேசானின் பெரும்பாலான ஊழியர்கள் விநியோக மையங்கள் மற்றும் கிடங்குகளில் பணிபுரிகின்றனர்.

இது அமேசானின் மூன்று தசாப்த கால வரலாற்றில் மிகப்பெரிய ஆட்குறைப்பாக இருக்கும். அந்த நிறுவனம் 2022-ல் சுமார் 27,000 வேலைகளைக் குறைத்தது.