உலகளவில் வெள்ளி விலை

2024-ல் உலக வெள்ளித் தேவையின் 58.6% தொழிற்துறையிலிருந்து வருகிறது. சூரிய ஒளியால் இயங்கும் பேனல்கள், மின்சார வாகனங்கள் போன்ற பசுமை தொழில்நுட்பங்களுக்கான வலுவான தேவை, வெள்ளியின் விலையேற்றத்திற்கு முக்கியக் காரணமாகும்.

2021-லிருந்து உலகளாவிய வெள்ளி உற்பத்தி, தேவைக்கு குறைவாகவே உள்ளது. புவிசார் அரசியல் பதட்டங்களால், முதலீட்டாளர்கள் பாதுகாப்பான முதலீடுகளைத் தேடுவதும், சில மத்திய வங்கிகள் வெள்ளியை வாங்கி தங்கள் கையிருப்பை அதிகரிப்பதும் விலை உயர்வுக்கு மேலும் ஊக்கமளிப்பதாக நிபுணர்கள் கூறுகின்றனர். இந்திய ரூபாயின் மதிப்பு குறைந்ததும் உள்நாட்டு விலைகளை உயர்த்தியுள்ளது.

பொருளாதார வளர்ச்சி, வாய்ப்புகள்
உலகப் பொருளாதாரம் மந்தமடைந்தால், வெள்ளிக்கான தொழிற்துறை தேவை குறையலாம். நிபுணர்களின் கருத்துப்படி, அமெரிக்காவில் வட்டி விகிதங்கள் உயர்ந்தால், அது வெள்ளி விலையைப் பாதிக்கலாம். வெள்ளி, தங்கத்தை விட அதிக ஏற்ற இறக்கம் கொண்டது, இதனால் அதிக ரிஸ்க் எடுக்கும் திறன் கொண்ட முதலீட்டாளர்களுக்கு இது பொருத்தமானது.

நீண்டகாலப் பார்வையில், தூய்மை ஆற்றல் மாற்றம், தொழிற்துறைத் தேவை ஆகியவை வெள்ளியின் விலையை தொடர்ந்து ஆதரிக்கும் என்று எதிர்பார்க்கப்படுகிறது. தங்கம்-வெள்ளி விகிதம், அதன் நீண்டகால சராசரியான 70x-ஐ விட தற்போது 85x-ஆக உள்ளது. இது வெள்ளி விலை மேலும் உயர வாய்ப்புள்ளது என்பதைக் குறிக்கிறது.

முதலீட்டாளர் செய்ய வேண்டியவை

வெள்ளியில் முதலீடு செய்தவர்கள், தங்கள் மொத்த முதலீட்டில் அதன் பங்களிப்பு 5-7% வரை இருந்தால், அதன் நிலையைத் தக்க வைத்துக் கொள்ளலாம். இதை மீறி இருந்தால், பகுதி அளவு லாபத்தை வெளியே எடுப்பதைப் பரிசீலிக்கலாம்.

புதிய முதலீட்டாளர்கள், அதிக ஏற்ற இறக்கத்தைத் தவிர்க்க, மொத்த தொகையை ஒரே நேரத்தில் முதலீடு செய்வதைத் தவிர்த்து, முறைப்படுத்தப்பட்ட முதலீட்டுத் திட்டத்தின் (SIP) மூலம் படிப்படியாக முதலீடு செய்யலாம்.

நீண்டகால முதலீட்டுக்கு, ஐந்து ஆண்டுகளுக்கு மேல் உள்ள முதலீட்டு காலம் தேவைப்படுகிறது. முதலீட்டாளர்கள், குறைந்த செலவின விகிதம் (expense ratio), அதிக பணப்புழக்கம் (liquidity) உள்ள வெள்ளி எக்ஸ்சேஞ்ச்-டிரேடட் ஃபண்டுகளை (ETFs) தேர்வு செய்யலாம்.