இந்தியா, சீனாவை சாடும் Trump

ஐக்கிய நாடுகள் பொதுச் சபையில் (UNGA) பேசுகையில், அமெரிக்க அதிபர் டொனால்ட் டிரம்ப், ரஷ்ய எண்ணெயை வாங்குவதன் மூலம் உக்ரைன் போருக்கு இந்தியா, சீனா முக்கிய நிதியாளர்களாக இருப்பதாக மீண்டும் குற்றம் சாட்டினார்.

இது டிரம்ப் இதற்கு முன்பு பலமுறை கூறிய குற்றச்சாட்டாகும், ஆனால் இந்தியா அதனை தொடர்ந்து மறுத்து வருகிறது.

இந்தியாவின் கொள்முதல் அதன் எரிசக்தி பாதுகாப்புக்கு அவசியமானது என்றும், உலகளாவிய எண்ணெய் சந்தைகளை நிலைநிறுத்த ஒரு காலத்தில் அமெரிக்காவே இதனை ஊக்குவித்ததாகவும் இந்தியா வாதிடுகிறது.

மேலும், இந்தியாவுக்கும் பாகிஸ்தானுக்கும் இடையிலான சமீபத்திய மோதலை நிறுத்துவதில் தான் முக்கிய பங்கு வகித்ததாகவும் டிரம்ப் மீண்டும் வலியுறுத்தினார். ஆனால், இந்தியா இதனை மறுத்துள்ளது. பாகிஸ்தானின் ராணுவ நடவடிக்கைக்கான தலைமை இயக்குனர் (DGMO), தனது இந்தியத் தரப்பினரிடம் போர் நிறுத்தம் கோரியதால் மட்டுமே மோதல் முடிவுக்கு வந்தது என்று இந்தியா விளக்கம் அளித்துள்ளது.

காஷ்மீரில் பயங்கரவாதத் தாக்குதலைத் தொடர்ந்து, இந்திய ராணுவம் எல்லையைத் தாண்டி, பயங்கரவாதப் பயிற்சி முகாம்கள் மீது தாக்குதல் நடத்தியது. இதற்குப் பதிலடியாக பாகிஸ்தான் இந்திய சிவிலியன் பகுதிகளை நோக்கி வான், ட்ரோன், ஏவுகணைத் தாக்குதல்களை நடத்தியது. இதற்கு இந்தியா, பாகிஸ்தானின் முக்கிய ராணுவ, குறிப்பாக விமானப்படைத் தளங்கள் மீது தாக்குதல் நடத்தி, அந்த நாட்டின் விமானப்படையை செயலிழக்கச் செய்தது.

ரஷ்ய எண்ணெய் கொள்முதல் குறித்த குற்றச்சாட்டுகளால், அமெரிக்கா-இந்தியா வர்த்தக பேச்சுவார்த்தைகள் தடைபட்டன. அண்மையில், டிரம்ப் இந்தியப் பொருட்களுக்கு கூடுதலாக 25% வரி விதித்தார்.

இதனால் மொத்த வரி 50% ஆனது. அத்துடன் இந்தியாவை “இறந்துபோன பொருளாதாரம்” என்று அவர் விமர்சித்தார். இதனால், டெல்லியில் நடைபெறவிருந்த வர்த்தகப் பேச்சுவார்த்தையின் எட்டாவது சுற்று ரத்து செய்யப்பட்டது.

இருப்பினும், பின்னர் இரு தலைவர்களும் தங்களின் நிலைப்பாட்டை சற்று தளர்த்தியதால் பேச்சுவார்த்தைகள் மீண்டும் தொடங்கின.