டி.சி.எஸுடன் AI பயன்பாட்டிற்காக 150 கோடி டாலர் மதிப்பிலான ஒப்பந்தம் செய்த போர்ஷே

டி.சி.எஸ், போர்ஷே ஒப்பந்தத்தின் ஒரு பகுதியாக, ஜெர்மனி மற்றும் ஐரோப்பாவில் வாகனத் துறை சார்ந்த ஆலோசனை மற்றும் செயற்கை நுண்ணறிவு மாற்றத்திற்கான திறன்களை வலுப்படுத்த, போர்ஷே ஏஜி-யின் சொந்த தகவல் தொழில்நுட்பச் சேவைப் பிரிவான MHP Management- und IT-Beratung GmbH (MHP) நிறுவனத்தை 32 கோடி யூரோக்களுக்கு TCS கையகப்படுத்தவுள்ளது.

MHP என்பது ஜெர்மனியைத் தலைமையிடமாகக் கொண்ட ஒரு வாகன மற்றும் தொழில்துறை ஆலோசனை நிறுவனமாகும். சுமார் 4,500 ஊழியர்களைக் கொண்ட இந்நிறுவனம், 2025-ஆம் ஆண்டில் 74.2 கோடி யூரோ வருவாயை ஈட்டும் என்று எதிர்பார்க்கப்படுகிறது; இதன் மூலம் கையகப்படுத்தல் மதிப்பீடு அந்த ஆண்டின் வருவாயில் சுமார் 0.4 மடங்காக அமைகிறது. இந்த ஒப்பந்தம் ஒழுங்குமுறை ஒப்புதல்கள் மற்றும் வழக்கமான நிபந்தனைகளுக்கு உட்பட்டது; இது மூன்று முதல் நான்கு மாதங்களுக்குள் நிறைவடையும் என்று எதிர்பார்க்கப்படுகிறது.

“MHP-யின் வலுவான இருப்பு மற்றும் தொழில்துறைத் தொடர்புகள், ஜெர்மனி மற்றும் பரந்த ஐரோப்பிய வாகன மற்றும் தொழில்துறை வாடிக்கையாளர்கள் மத்தியில் TCS-இன் நிலையை வலுப்படுத்தும்” என்று JM ஃபைனாசியல் தெரிவித்துள்ளது. மேலும், இந்தக் கையகப்படுத்தல் TCS-இன் ஒட்டுமொத்த வருவாயில் ஆண்டு அடிப்படையில் சுமார் 3 சதவீதத்தை சேர்க்கக்கூடும் என்றும் அது கூறியுள்ளது.

அதேவேளையில், MHP-யின் வருவாய் சார்ந்த சவால்கள், வாடிக்கையாளர் தளத்திலேயே மேற்கொள்ளப்படும் வணிக முறை, கண்ணுக்குத் தெரியாத சொத்துக்களின் மதிப்புத் தேய்மானம், திறமையான பணியாளர்களைத் தக்கவைத்தல் மற்றும் பரிவர்த்தனை-ஒருங்கிணைப்புச் செலவுகள் ஆகியவற்றைக் கருத்தில் கொள்ளும்போது, இந்த ஒப்பந்தம் முதல் ஆண்டில் EBIT வரம்பில் சுமார் 50 அடிப்படை புள்ளிகள் சரிவையும், ஒரு பங்குக்கான வருவாயில் (EPS) சிறிய அளவிலான சரிவையும் ஏற்படுத்தக்கூடும் என்று எம்கே குளோபல் தெரிவித்துள்ளது.

“ஒப்பந்தம் நிறைவடையும் வரை, எங்கள் வருவாய் மதிப்பீட்டில் இந்த பரிவர்த்தனையை (இது TCS-இன் வருவாயில் சுமார் 2.8 சதவீதத்தை சேர்க்கக்கூடும்) நாங்கள் கணக்கில் எடுத்துக்கொள்ளவில்லை” என்று கூறியுள்ள அந்நிறுவனம், TCS பங்கிற்கான ‘ADD’ (சேர்க்கலாம்) மதிப்பீட்டையும், ₹2,600 என்ற இலக்கு விலையையும் தக்கவைத்துள்ளது.

கூடுதலாக, நீண்ட கால அடிப்படையில் AI-சார்ந்த மாற்றங்கள் மற்றும் வணிக முடிவுகளை முன்னெடுப்பதற்காக, போர்ஷே ஏஜி நிறுவனத்துடன் 125 கோடி யூரோ மதிப்பிலான ஐந்து ஆண்டு கால முக்கிய ஒப்பந்தத்திலும் TCS கையெழுத்திட்டுள்ளது.