பெரிய சீர்திருத்தம்???

இந்திய ரிசர்வ் வங்கி அடிப்படை சேமிப்பு வங்கி வைப்புத்தொகை (BSBD) கணக்குகளில் ஒரு பெரிய சீர்திருத்தத்தை அறிவித்துள்ளது. குறைந்தபட்ச இருப்புத் தேவைகளை, நீக்கி, பரந்த அளவிலான இலவச சேவைகளை கட்டாயமாக்குகிறது. இந்த மாற்றங்கள் BSBD கணக்குகளை, முழு சேவைகளை கொண்ட, பூஜ்ஜிய இருப்பு சேமிப்புக் கணக்குகளாக மாற்றுகின்றன.

ரிசர்வ் வங்கியின் இந்த சீர்திருத்தத்திற்கு முன்னாள் நிதியமைச்சரும், மூத்த காங்கிரஸ் தலைவருமான ப.சிதம்பரம் வரவேற்பு தெரிவித்துள்ளார். முன்னாள் ரிசர்வ் வங்கி ஆளுநர்களான சி.ரங்கராஜன் மற்றும் பிமல் ஜலன் ஆகிய இருவரால் அறிமுகப்படுத்தப்பட்ட பூஜ்ஜிய இருப்பு சேமிப்புக் கணக்கு திட்டத்தை தற்போது ரிசர்வ் வங்கி விரிவுபடுத்தியுள்ளதை பாராட்டியுள்ளார்.

திருத்தப்பட்ட கட்டமைப்பின் கீழ், BSBD கணக்குகளுக்கு, இனி வரம்பற்ற மாதாந்திர வைப்புத்தொகை செலுத்தும் வசதி, வழங்கல் அல்லது புதுப்பித்தல் கட்டணங்கள் இல்லாத இலவச ATM அல்லது டெபிட் கார்டு வசதி மற்றும் வருடத்திற்கு குறைந்தது 25 இலைகளுடன் கூடிய காசோலை புத்தக வசதி ஆகியவற்றை அனைத்து வங்கிகளும் வழங்க வேண்டும். வாடிக்கையாளர்கள் இணையம் மற்றும் மொபைல் வங்கிச் சேவைகளுக்கும், ஒரு பாஸ்புக் அல்லது மாதாந்திர டிஜிட்டல் அறிக்கைக்கும் உரிமை பெறுவார்கள். அடிப்படைக் கணக்குகளை நம்பியிருக்கும் வாடிக்கையாளர்களுக்கு அத்தியாவசிய வங்கிச் சேவைகள் மறுக்கப்படவோ அல்லது மறைக்கப்பட்ட கட்டணங்கள் வசூலிக்கப்படவோ கூடாது என்பதை உறுதி செய்வதே RBI இன் நோக்கமாகும்.

வங்கிகள் இப்போது ஒவ்வொரு மாதமும் குறைந்தபட்சம் நான்கு முறை இலவசமாக பணத்தை எடுக்க அனுமதிக்க வேண்டும், இதில் குறிப்பிட்ட வங்கியின் ATM மற்றும் இதர வங்கிகளின் ATM பரிவர்த்தனைகள் ஆகியவை அடங்கும். முக்கியமாக, UPI, IMPS, NEFT அல்லது RTGS மூலம் செய்யப்படும் டிஜிட்டல் பணம் செலுத்துதல்கள், இந்த பணம் எடுக்கும் ஒதுக்கீட்டின் ஒரு பகுதியாகக் கணக்கிடப்படாது. இதனால் ஆன்லைன் கட்டண முறைகளை ஏற்றுக்கொள்வதற்காக வாடிக்கையாளர்களுக்கு அபராதம் விதிக்க முடியாது. இந்த நடவடிக்கை BSBD கணக்குகள் பரவலாகப் பயன்படுத்தப்படும் சிறிய நகரங்கள் மற்றும் கிராமப்புறங்களில் டிஜிட்டல் சேர்க்கையை கணிசமாக மேம்படுத்தும் என்று எதிர்பார்க்கப்படுகிறது.

வாடிக்கையாளர்கள் தங்கள் தற்போதைய சேமிப்புக் கணக்குகளை, பூஜ்ஜிய இருப்பு கொண்ட BSBD கணக்குகளாக மாற்றவும் புதிய விதிமுறைகள் அதிகாரம் அளிக்கின்றன. அதே நேரத்தில் அவர்கள் வேறு வங்கியில் மற்றொரு BSBD கணக்கை வைத்திருக்க கூடாது. வங்கிகள் ஏழு நாட்களுக்குள் மாற்றக் கோரிக்கைகளைச் செயல்படுத்த வேண்டும், மேலும் இந்தச் செயல்பாட்டிற்கு கட்டணம் எதுவும் வசூலிக்க தடை விதிக்கப்பட்டுள்ளது.இந்த சீர் திருத்தங்கள் ஏப்ரல் 1, 2026 முதல் முறையாக அமலுக்கு வரும்.