வட்டியை குறைத்தது அமெரிக்க ஃபெடரல் ரிசர்வ் வங்கி

அமெரிக்காவின் ஃபெடரல் ரிசர்வ் வங்கி, அதன் முக்கிய வட்டி விகிதத்தை தொடர்ச்சியாக மூன்றாவது முறையாக நேற்று 0.25% அளவுக்கு குறைத்து, 3.6%ஆக குறைத்துள்ளது. வரும் மாதங்களில் வட்டி விகிதங்களை மாற்றாமல் தற்போதைய அளவில் வைத்திருக்கக் கூடும் என்றும் மறைமுகமாக தெரிவித்துள்ளது.

பொருளாதாரத்தின் நிலையை மதிப்பிடும்போது, வரும் மாதங்களில் மேலும் வட்டி குறைப்புகளைத் தவிர்ப்போம் என்று ஃபெடரல் ரிசர்வ் தலைவர் ஜெரோம் பவல் ஒரு செய்தியாளர் சந்திப்பில் கூறினார். மேலும், காலாண்டு பொருளாதார கணிப்புகளின் அடிப்படையில், அடுத்த ஆண்டில் ஒரு முறை மட்டுமே விகிதத்தை குறைக்க எதிர்பார்ப்பதாக ஃபெடரல் ரிசர்வ் அதிகாரிகள் கூறினர்.

புதன்கிழமை செய்யப்பட்ட இந்தக் குறைப்பு, வட்டி விகிதத்தை சுமார் 3.6 சதவீதமாகக் குறைத்தது, இது கிட்டத்தட்ட மூன்று ஆண்டுகளில் இல்லாத குறைந்தபட்ச விகிதமாகும். ஃபெடரல் ரிசர்வின் குறைந்த வட்டி விகிதங்கள், அடமானக் கடன்கள், வாகனக் கடன்கள் மற்றும் கிரெடிட் கார்டுகளுக்கான கடன் செலவுகளை காலப்போக்கில் குறைக்கக்கூடும்.

வேலைவாய்ப்பை அதிகரிக்க, வட்டி விகிதங்களைக் குறைப்பதை ஆதரிப்பவர்களுக்கும், பணவீக்க அளவு, ரிசர்வ் வங்கியின் 2 சதவீத இலக்கிற்கு மேல் இருப்பதால் விகிதங்களை மாற்றாமல் வைத்திருக்க விரும்புபவர்களுக்கும் இடையே முரண்பாடுகள் தொடர்கின்றன.பணவீக்கம் முழுமையாகக் கட்டுப்பாட்டிற்குள் வருவதற்கான தெளிவான அறிகுறிகளைக் காட்டாத வரையில், அல்லது வேலையின்மை மோசமடையாத வரையில், இந்த பிளவுகள் நீடிக்கும்.

டிரம்ப் இந்த குறைப்பு மிகவும் சிறியது என்று விமர்சித்தார். ”இது குறைந்தது இரு மடங்காக” இருந்திருக்க வேண்டும் என்று தான் விரும்புவதாகக் கூறினார். மே மாதம் பவலின் பதவிக்காலம் முடிவடையும் போது, அவருக்குப் பதிலாக இந்த மாத இறுதியில் ஒரு புதிய ஃபெடரல் ரிசர்வ் தலைவரை டிரம்ப் நியமிக்கக்கூடும். டிரம்ப்பின் புதிய தலைவர், பல அதிகாரிகள் ஆதரிப்பதை விட கூர்மையான வட்டி குறைப்புகளுக்கு அழுத்தம் கொடுக்க வாய்ப்புள்ளது.

ஃபெடரல் ரிசர்வின் இந்த நடவடிக்கையினால் பங்குச் சந்தைகள் உயர்ந்தன,. எஸ்&பி 500 பங்கு குறியீடு 0.7 சதவீதம் உயர்ந்து, அக்டோபரில் எட்டப்பட்ட உச்சத்திற்கு அருகில் நிறைவடைந்தது.