தேர்தல் தோல்விக்கு ஈரான் போர் காரணம் என ஒப்புக்கொண்ட டிரம்ப்
ஈரான் மீதான போர், இடைக்காலத் தேர்தலில் குடியரசுக் கட்சியினருக்குப் பெரும் இழப்புகளை ஏற்படுத்தியது என்பது “பெரும்பாலும் உண்மைதான்” என்று அமெரிக்க அதிபர் டொனால்ட் டிரம்ப் புதன்கிழமை தெரிவித்தார். இருப்பினும், தனது நிலைப்பாட்டில் உறுதியாக இருந்த அவர், “நீண்ட கால அடிப்படையில்” இதுவே “ஒரே தீர்வு” என்பதால், மீண்டும் அதே நடவடிக்கையைத்தான் மேற்கொள்வேன் என்று கூறினார்.
ஈரான் மீதான போரினால் இடைக்காலத் தேர்தலில் குடியரசுக் கட்சியினர் தோல்வியைச் சந்தித்தனர் என்று துணை அதிபர் ஜே.டி. வான்ஸ் கூறிய கருத்து குறித்த கேள்விக்கு பதிலளித்த டிரம்ப், “இது பெரும்பாலும் உண்மைதான், ஏனெனில் குறுகிய காலத்தில் இது பெட்ரோல் விலையைச் சற்று உயர்த்தியது” என்று செய்தியாளர்களிடம் தெரிவித்தார்.
“அதே சமயம், மீண்டும் அதே சூழல் ஏற்பட்டால், நான் மீண்டும் அதே முடிவைத்தான் எடுப்பேன். ஏனெனில், நீண்ட கால அடிப்படையில் இதுவே ஒரே தீர்வு. ஈரான் அணு ஆயுதத்தைப் பெறுவதை நாம் அனுமதிக்க முடியாது,” என்று அவர் கூறினார்.
இந்தப் போரைப் பொறுத்தவரை, அமெரிக்கா வேறு எந்த விதத்திலும் செயல்பட்டிருக்க முடியாது என்று அதிபர் வலியுறுத்தினார்.
“இந்தப் போரைப் பொறுத்தவரை, நான் எதையும் மாற்றியிருக்க மாட்டேன். அவர்களின் ராணுவத்தை நாங்கள் முழுமையாகச் சிதைத்துவிட்டோம். அவர்களின் கடற்படை அழிந்துவிட்டது, விமானப்படை இல்லை, வான் பாதுகாப்பு அமைப்புகளும் இல்லை,” என்று டிரம்ப் கூறினார்.
“ஈரான் விவகாரத்தில் நாங்கள் நடவடிக்கை எடுக்க வேண்டியிருந்தது, அதைத் தொடர்ந்து செய்துகொண்டும் இருக்கிறோம். தற்போது ஹார்முஸ் நீரிணை வழியாக பெருமளவு எண்ணெய் ஏற்றுமதி செய்யப்படுகிறது. ஆரம்பத்தில் இது சுத்தமாக இல்லை. ஒருவேளை, போரை விட, இந்த எண்ணெய் விலைதான் (தேர்தல் தோல்விக்கு) முக்கிய காரணமாக இருந்திருக்கலாம்,” என்று டிரம்ப் குறிப்பிட்டார்.
ஈரான் மீதான போர் குறித்து பொதுமக்களிடையே அதிருப்தி நிலவினாலும், பாதுகாப்புத் துறை செயலாளர் பீட் ஹெக்ஸெத்தை மாற்றும் எண்ணம் தனக்கு இல்லை என்றும் அதிபர் தெரிவித்தார். ஹெக்ஸெட் “மிகச் சிறப்பாகச் செயல்பட்டு வருகிறார்” என்று அவர் கூறினார்.
வெள்ளை மாளிகையில் டிரம்பிற்கு அடுத்த வாரிசாகக் கருதப்படும் துணை அதிபர் ஜே.டி. வான்ஸ், ஈரான் மீதான அதிபரின் போரே இடைக்காலத் தேர்தலில் குடியரசுக் கட்சியினரின் படுதோல்விக்குக் காரணம் என்று குற்றம் சாட்டியிருந்தார்.
