தீவனங்கள் விலை உயர்வால் முட்டை, கோழி இறைச்சி விலை 30% உயர வாய்ப்பு
சோளம் மற்றும் உடைந்த அரிசி போன்ற கோழித் தீவனங்களின் விலை கடந்த ஓராண்டுடன் ஒப்பிடுகையில், கடந்த ஒரு மாதத்தில் மட்டும் 30-45% வரை உயர்ந்துள்ளது. இதன் விளைவாக, டிசம்பர் மாதத்திற்குள் முட்டை மற்றும் கோழி இறைச்சியின் விலை 25-30% வரை உயரக்கூடும் என்று எதிர்பார்க்கப்படுகிறது.
சோளம் மற்றும் உடைந்த அரிசியின் விலை கடந்த ஓராண்டில் இரு மடங்காக அதிகரித்துள்ளது. வர்த்தகர்களும் விவசாயிகளும் சோளத்தைப் பதுக்கி வைத்துள்ளதால், டிசம்பர் மாதம் வரையிலும் இந்த விலை உயர்வு நீடிக்கும் என்று சோளத்தை மூலப்பொருளாகப் பயன்படுத்தும் தொழில் துறையினர் கருதுகின்றனர்.
கடந்த ஆண்டு கிலோ ஒன்றுக்கு சுமார் ரூ.18ஆக இருந்த சோளத்தின் விலை, இன்று 34 ரூபாயாக உயர்ந்துள்ளது. ஒரு மாதத்திற்கு முன்பு இதன் விலை கிலோ ஒன்றுக்கு சுமார் ரூ.26-ரூ.27 ஆக இருந்தது. விநியோகச் சங்கிலியில் உள்ள இடைத்தரகர்கள், விலை மேலும் உயரும் என்ற எதிர்பார்ப்பில் சோளத்தைப் பதுக்கி வைப்பதால், டிசம்பர் மாதத்திற்குள் அதன் விலை கிலோ ஒன்றுக்கு 40 ரூபாயை எட்டக்கூடும் என்று தொழில் துறையினர் கவலை தெரிவிக்கின்றனர்.
வணிகத் தரவுகளின்படி, கடந்த ஆண்டு நவம்பர் வாக்கில் கிலோ ஒன்றுக்கு ரூ.14-ரூ.15 ஆக இருந்த உடைந்த அரிசியின் விலை, தற்போது ரூ.31-ரூ.32 ஆக உள்ளது. ஒரு மாதத்திற்கு முன்பு இதன் விலை கிலோ ஒன்றுக்கு சுமார் ரூ.22-ரூ.23 ஆக இருந்தது.
தொழில் துறை மதிப்பீடுகளின்படி, மகாராஷ்டிரா மற்றும் கர்நாடகா போன்ற முக்கிய காரிஃப் பருவ சோள உற்பத்தி மாநிலங்களில் பருவமழை பற்றாக்குறையாக இருந்ததால், நாட்டின் ஒட்டுமொத்த காரிஃப் சோள உற்பத்தி 15-16% வரை குறையக்கூடும் என்று எதிர்பார்க்கப்படுகிறது.
தற்போது முட்டையின் மொத்த விற்பனை விலை ஒன்றுக்கு சுமார் ரூ.6-ரூ.7 ஆக உள்ளது; இது டிசம்பர் மாதத்திற்குள் ரூ.7- ரூ.8 ஆக உயரக்கூடும். அதேபோல், தோல் நீக்கப்பட்ட கோழி இறைச்சியின் மொத்த விற்பனை விலை, தற்போது கிலோ ஒன்றுக்கு ரூ.225- ரூ.250 ஆக இருப்பது, டிசம்பர் மாதத்திற்குள் ரூ.260- ரூ,275 ஆக அதிகரிக்க வாய்ப்புள்ளது என்று தொழில் துறை நிர்வாகிகள் தெரிவித்துள்ளனர்.
