ராணிப்பேட்டை ஆலையில் தொடங்கியது ரேஞ்ச் ரோவர் உற்பத்தி..!!

டாடா மோட்டார்ஸ் பயணிகள் வாகனங்கள் நிறுவனம் அதன் முதல் JLR காரான ரேஞ்ச் ரோவர் எவோக் மாடலை சென்னையிலிருந்து 90 கி.மீ மேற்கே உள்ள ராணிப்பேட்டை – பனப்பாக்கத்தில் உள்ள டாடா மோட்டார்ஸ் – JLR தொழிற்சாலையில் இருந்து நேற்று அறிமுகப்படுத்தியது.

தமிழக முதலமைச்சர் மு.க. ஸ்டாலின், இந்த தொழிற்சாலையில் உள்ள முற்றிலும் பிரிக்கப்பட்ட பாகங்கள் முறையிலான (CKD) வாகன உற்பத்தி பிரிவை திறந்து வைத்து, தொழிற்சாலைக்குள் சிறிது தூரம் முதல் காரை ஓட்டினார்.

ஹூண்டாய், ரெனால்ட், நிசான், BMW, ஸ்டெல்லாண்டிஸ் மற்றும் வின்ஃபாஸ்ட் ஆகியவற்றிற்குப் பிறகு தமிழகத்தில் தங்கள் கார்களை உற்பத்தி செய்யும் ஏழாவது ஆட்டோமோபைல் நிறுவனமாக டாடா-ஜேஎல்ஆர் மாறியுள்ளது.
டாடா மோட்டார்ஸ் இந்த திட்டத்திற்காக ₹9,000 கோடி முதலீட்டை உறுதி செய்துள்ளது. இது பல ஆண்டுகளில் படிப்படியாக செயல்படுத்தப்படும்.

தற்போது, இந்நிறுவனம் அதன் அனைத்து CKD செயல்பாடுகளையும் புனேவில் உள்ள அதன் தொழிற்சாலையில் முன்னெடுத்து வருகிறது. காலப்போக்கில், அவற்றை தமிழ்நாடு ஆலைக்கு மாற்ற திட்டமிட்டுள்ளதாக இந்நிறுவனத்தின் மூத்த அதிகாரி ஒருவர் கடந்த ஆண்டு ஊடகவியலாளர்களிடம் தெரிவித்தார்.

செப்டம்பர் 2024 இல், டாடா மோட்டார்ஸ் தமிழ்நாட்டின் ராணிப்பேட்டை மாவட்டத்தில் உள்ள பனப்பாக்கத்தில் ஒரு புதிய வாகன உற்பத்தி வசதிக்கான அடிக்கல் நாட்டியது.

இந்த தொழிற்சாலை ஆண்டுக்கு 2.5 லட்சம் யூனிட்டுகளைத் தாண்டும் திறன் கொண்டதாக இருக்கும் என்று எதிர்பார்க்கப்படுகிறது. அடுத்த 5 முதல் 7 ஆண்டுகளில் இந்த இலக்கை அடைய, உற்பத்தி படிப்படியாக அதிகரிக்கப்படும்.